香港首富李嘉誠只不過講咗一句希望對年輕人「網開一面」，立即引嚟內地官方同網民批鬥，十足十中共當年鬥地主咁。作為六七暴動主旗手之一嘅工聯會，立即緊跟北京步伐，今次由工聯會會長吳秋北親自出手，貼咗一張將李嘉誠醜化成曱甴嘅圖，實行要鬥垮鬥臭「超人」，暗示將佢當曱甴咁打！
疑似暗示係反送中幕後黑手
吳秋北噚日喺facebook發文，寸李嘉誠富可敵國，「吟瓜詩，網開面，就是態度，就是權威」，指呢啲說話畀年輕人聽到，「當然更只能氣往政府出，暴朝警察施，惡向良民行」，之後話咁樣自然無法「止暴制亂」，連中央政法委都唔放在眼內，只想保住自己商業王國「袋袋平安，甚或千秋萬世」。
吳秋北成篇文對超人單單打打、仲暗露政治殺機，下下將超人講到同北京對立咁，但佢最毒係貼咗一張將超人畫成曱甴嘅網上圖片，超人頭上面仲有曱甴王三隻字，似乎想暗示超人係反送中幕後黑手。有民主派人士同八方講，吳秋北咁做，擺明要將超人當成差人同藍絲口中嘅黃絲曱甴，班差人、藍絲開口埋口就話要打黃絲曱甴，吳秋北又係咪想煽動佢哋去對付超人呢？該民主派人士又話，須知超人對北京現代化建設無功都有勞，即使中央政法委批超人嘅「網開一面」言論，都唔會踩超人係曱甴，吳秋北咁搞法，係咪北京下命令要鬥垮鬥臭超人？商界、外資見到工聯會咁鬥超人，又點會唔心寒？甚至諗係咪要撤資走人？
李八方