上周六國際賽後西甲重開，尾場重頭戲就有巴塞隆拿主場對華倫西亞，巴塞呢場就威喇，憑住新星安素法迪同今夏加盟嘅法蘭基迪莊各交出1傳1射，後備復出嘅蘇亞雷斯亦梅開二度，喺魯營大勝5:2。球王美斯雖繼續因傷缺陣，但都有喺看台觀戰，而近期有傳喺美職聯籌組緊邁阿密國際嘅碧咸，想誠邀美斯加盟，派咗嘅代表接觸美斯老竇，喺倫敦會面傾談。
派特使同老美斯倫敦密斟
美斯同巴塞嘅合約雖去到2021年先完，但早前獲會長巴杜美確認，合約列明佢踢完今季後有權以自由身離隊，巴杜美亦好有信心美斯會留低，仲準備同佢傾新約。不過，最近就傳碧咸乘虛而入，想請美斯加盟下年三月亮相美職聯嘅邁阿密國際。英國《太陽報》仲爆料，話咸爺已經坐言起行，喺呢個周末派咗代表，同美斯嘅老竇兼經理人相約倫敦密斟。點解會揀倫敦？就因為咸爺本身都就喺當地睇熱刺主場大炒水晶宮4:0場波，如果真係傾得成，同美斯老竇見個面都方便啲。順道一提，咸爺去睇熱刺場波，就俾人影到佢同熱刺領隊普捷天奴攬頭攬頸，而普帥賽後仲話咸爺同佢講，好鍾意熱刺啱啱起好嘅新主場，如果自己未退休就會踢熱刺咁話！
巴塞新星單場破三紀錄
美斯係咪真係去美職，可能就要慢慢睇先知，但好似巴杜美之前話齋，巴塞都要鋪定後路，所以佢哋今季就發掘咗安素法迪呢位新星。呢位國際賽周前對奧沙辛拿後備上陣兼入波嘅幾內亞比紹前鋒，對華倫一場正選上陣又創紀錄，先以16歲零318日之齡成為球會史上喺魯營正選披甲嘅最年輕球員，仲兩分鐘就入波，成為歷來喺魯營入波嘅最年輕球員，之後再助攻畀法蘭基迪莊，成為西甲史上單場交出入波同助攻嘅最年輕球員，1場就創咗3個紀錄，認真威水。至於迪莊亦唔失禮，同樣1入球1助攻，傳球成功率仲要100％，難怪賽後當選最佳球員。
可能見到班後生仔咁勁，碧基同阿蘇都唔執輸，前者靠門前執雞喺下半場入一粒，而傷癒復出嘅阿蘇，喺後備入替掂第一腳波，就起腳射破對方大門，之後再接應基沙文傳波梅開二度。至於阿蘇入第一球嗰陣，仲將入波獻畀前巴塞教練安歷基，喺上月因骨癌離世嘅九歲女兒山娜，情深意重。
