郭富城前晚喺台北小巨蛋舉行尾場演唱會，除咗有林心如、甄珍等藝人睇騷外，城城老友沈嘉偉就帶埋老婆邱淑貞同細女沈晨專程捧場。下月54歲生日嘅城城大方騷肌肉，又不停讚自己保養好，但就話𠵱家騷肌要適可而止，因為驚囡囡有樣學樣，佢笑話：「如果有朋友問郭富城現在怎麼樣，拜託你跟他說很年輕，肌肉還是滿滿的。」不過佢提到要keep住身材好辛苦，因為今次一到台灣就趕去食麻辣火鍋，代價就係半夜3點要地獄式踩單車健身。
城城喺台灣發迹，佢話：「還記得我剛來台灣的時候，不會講普通話，大家都笑我，現在還是說得不好，不一樣的是，你們沒有笑我，每一次我回到台灣好像都是演員身份跟大家見面，不是歌手的身份，很高興你們沒有忘記。」
邱淑貞雪糕𠱁女
早排唔舒服入院嘅甄珍，講到健康問題時話：「時好時壞，血壓一下高一下低。」佢又直指城城係自己偶像：「看到他會讓我覺得自己很年輕！」至於睇完騷嘅邱淑貞一家三口噚日就現身台灣桃園機場，有《蘋果》讀者透過「爆相爆片」分享當時情況，細女沈晨上機前仲拎住杯雪糕食。
撰文：馮仁昭