反送中條例風波未息，財雄勢大嘅民建聯搶先為11月區議會選舉發功，兵分兩路，一方打正旗號，用民建聯名義，在報紙（竟然唔係文匯大公）刊登頭版廣告，「民建聯強烈要求政府，引用『收回土地條例』，大量興建公營房屋，爭取3年上樓」，另一路兵，就係一啲同民建聯有密切關係人士，組織一個保民聯，聲言「只講民生、不談政治」，預備參加區選。
有啲人話，民建聯點解會一分為二，互相鎅票呀？其實邊會互相搶票吖！最大可能性就係民建聯在反送中事件中，盲目撐林鄭，已經失晒分，故此一批人決意另舉招牌，用「保民聯」之名去競選而已，情況就如劉江華以前在沙田區參選，掛上另外一個招牌咁樣，希望能夠力保區選不失啫，保民聯嘅顏色係深藍，選民不可不知。
至於民建聯主張引用「收回土地條例」，明顯係為咗嘩眾，泛民尹志堅立即踢爆，民建聯在立法會本來反對引用此條例，林鄭堅決不肯引用，得民建聯工聯會奮力支持。今次點解反轉豬肚？明顯係打民生牌。建制派分析反送中風波至今仍然腦袋淤塞，以為青年人上街，主要原因係上唔到樓，認為起多啲樓就可解決問題，可以取悅30歲以下青年及無殼蝸牛。此乃過時分析，《南華早報》（馬雲的報紙）已經發表不少教授級文章，話今天香港青年追求嘅不是物質，不是房屋，而是非物質文化，民主與自由，免於受監控的自由及言論自由。林鄭斷錯症，民建聯工聯會亦無獨立思考能力，以為當今香港人係豬，餵飽就得，故此一味提出民生政策，醫熱咳叫病人飲薑湯、食麻辣火鍋。民建聯呢次與政府及地產建設商會夾晒檔，廣告一出嚟，就開記招，商會居然表示歡迎，然後立即約到發展局局長開會商議，幾方面嘅默契非常好，亦「呃到like」，經濟干預派人士自然發表文章配合。點知市場派經濟學者唔生性，徐家健副教授在專欄（蘋果B4版，9月11日）批評民建聯鬥地主，指地產股岌岌可危矣，令人想起上世紀1950年代毛澤東鬥地主，逐步將所有土地收歸國有（左丁山姨媽家族被劃為富農，被逼跪玻璃，低頭聽家中舊傭工痛罵批鬥，鬱鬱而終）。他日一聲引用「收回土地條例」，新界原居民唔好以為唔關佢哋事，只係恒基、新地、新世界、長實受打擊，鄉村閒置土地咪又一樣！又有一個可能性，就係政府民建聯及地產商合演大龍鳳，將一啲冇三通一平，形同廢地嘅雞肋地推出來應景，呃like就算交數！