藍絲呢排成日搞啲假新聞嚟屈反送中人士，今次受害者就輪到商台主持潘小濤（圖），屈佢喺電台叫人破壞港鐵同跳閘，結果搞到商台嚴正聲明否認，話對有人惡意中傷深表遺憾，保留法律追究權利。
保留法律追究權利
商台聲明話最近網上流傳潘小濤喺10號嘅《在晴朗的一天出發》節目入面話，「我哋有畀錢坐地鐵，點解唔可以破壞」，又話佢呼籲市民「坐地鐵可以跳閘，免費搭地鐵」，有藍絲仲食住上留言攻擊潘小濤，話佢濫用大氣電波頻道，用誇張失實歪理誤導市民，荼毒年輕人思想喎。
不過聽返當日節目，主持人只係討論林鄭月娥喺9.8反修例衝突後去中環港鐵站視察受損設施，有主持提到港鐵行政總裁金澤培回應設施受損時話，希望市民珍惜港鐵提供嘅服務，潘就插嘴寸金澤培：「唔使畀錢㗎？」之後又鬧港鐵調整票價機制只可加不可減，巴士同小巴營運又被扼殺，港鐵上蓋物業要邊度就邊度，完全冇藍絲所講內容，明係老屈。
商台喺聲明入面亦話有關指摘完全冇任何事實基礎，對惡意中傷留言，深表遺憾，並保留追究一切法律權利。而潘小濤接受查詢時話，商台作為一個廣播機構，發出聲明以正視聽係需要嘅，「因為呢個唔係我個人問題，係關乎成個行業，所以公司澄清返係恰當嘅」。