關智斌（Kenny）一連兩場的首個處男演唱會，前晚紅館開鑼，原先是BOYZ合體開騷，但因拍檔張致恒爆出一腳踏五船醜聞，累BOYZ演唱會胎死腹中，最後英皇捧Kenny單拖開騷圓他的紅館夢，容祖兒、Twins、古巨基及「密友」張敬軒出任嘉賓。
將愛化作支持
Kenny和軒仔一同登場最哄動，Kenny穿上白西裝演唱《情陷百老匯》，而全黑打扮的軒仔彈琴伴奏，唱畢軒仔說：「歡迎嚟到相敬如斌演唱會，係咪應該攬吓？」但兩人只是輕輕擁抱。軒仔讚Kenny值得擁有今個演唱會，觀眾起哄大叫「咀嘴」、「結婚」，但兩人無反應。工作人員拿來巨型果籃，軒仔拿起火龍果笑說：「火龍果好似我咁有益，食咗就……」。兩人合唱《笑忘書》時齊齊眼濕濕，唱畢終來個深情擁抱，軒仔表示：「人生有好多愛係可以不斷昇華，好似今晚大家將呢份愛化做對Kenny嘅支持。」
被祖兒摸胸肌
基仔和Kenny以組合姿態合唱BOYZ的《LALA世界》，Kenny謂：「佢知我冇咗個拍檔，就嚟代替。」基仔笑指網民稱他們為「巨斌組合」、「童顏巨斌」，大玩不文。Twins出場跟Kenny合唱《明愛暗戀補習社》及《愛情當入樽》，唱完蔡卓妍（阿Sa）表示：「你喺我眼裏嘅都係優點。」鍾欣潼即說：「比如話你講嘢好直。」阿Sa笑問Kenny：「你直㗎咩？」Kenny指是率直。
Kenny亦獻唱連串快歌《Sexy Back》、《Volar》、《Sorry Sorry》、《越夜越有機》及《大熱》，他脫去上衣露出六嚿腹肌身形跟男舞蹈員跳舞，之後祖兒出場跟Kenny合唱《隆重登場》，她不時摸他胸肌：「點解咁益我，好實呀，好似石春咁呀，你（胸肌）識唔識震呀？」全場爆笑。Kenny自言天資有限，但已出盡全力：「我一直以為人生係加法，但因為呢個騷，我諗人生其實係減法，減去我嘅青春、笑容、同你共同拚命嘅隊友。當中有人喺你身邊支持你嘅時候，一定要珍惜，今晚我一定永世難忘。」接着唱出軒仔為他作曲的《預言書》，最終忍不住流下男兒淚。
採訪：盧妹
攝影：陳俊強