寶星是林女士十多年來的理想和心血。她03年由內地移居香港後不久，就開始在老人院做雜工，見盡本該安享晚年的銀髮族，卻被置於環境差劣的院舍內無人理會的慘況。她仍記得初入行時照顧過的一個婆婆。那時她對工作不熟悉，婆婆嫌她服務不周。但有次婆婆跌倒，獲林女士送入醫院，才發現婆婆「冇人冇物」孤身一人。於是她代替婆婆的親人，每日抽時間探病、抹身，一直到婆婆離開人世，「到最後，佢同我講咗一句『好心有好報』，我聽咗好感動。我無父無母，好似孤兒咁長大，嗰個婆婆好似畀咗母愛我咁」。
林女士指，由那刻起就決心將來要自己經營一間老人院，親力親為提供合理的伙食和服務。她在不同老人院工作，邊儲錢、邊累積經驗，又在公餘時間進修。到2012年，林女士動用自己多年來的積蓄、向朋友借款，兒子廖先生又將手頭僅有的物業平賣套現，總算夠資金頂手寶星護老中心。
調低收費 留錢給長者購物
當時廖先生亦決定幫助媽媽，母子檔經營寶星。廖先生負責對外聯絡供應商、社署、業主，而林女士就擔當保健員，對內照顧老人家。院內大小事二人都要親身參與，這7年幾乎沒有放假，「甚至係深夜，只要係啲員工打電話畀我哋，都要即刻趕番嚟。」廖先生嘆道。家庭式經營的寶星經常被外間看輕，林女士記得，當初伙食食材的供應商多次質疑她們：「你哋有冇錢畀到我哋㗎？月結有冇錢還？」但即使再難捱，寶星的服務費一直都比外面平均市價低一、兩成，以照顧基層老人，亦會因應院友的經濟狀況調低收費，確保依賴綜援生活的老人家每月有餘錢可以出外消費。
廖先生指，院友已經適應了寶星的環境多年，「當咗呢度係一個屋企」，不願離開，同時亦無法負擔外面價格高昂的院舍。他向院友宣佈結業消息時，只能不停講「對唔住」，「揹起咗佢哋一個責任，但我哋照顧唔到佢哋落去」。
林女士講到院友對寶星的感情亦覺激動：「有個90幾歲阿婆聽到（被逼遷），就盲目咁行咗幾日搵單位，又唔講我聽。搵到地方先打電話畀我，我話唔係咁做㗎，你話係咪好感動？」現時仍有少於十名院友未能搬走，大都經濟能力較差，或需要高度照顧，外面的院舍不願接收。
即使順利找到新的安身之處，對已步入晚年的老人家亦難以適應。廖先生指，有一位老人家在9月初搬離寶星後僅兩天，就撒手塵寰，「我唔知道佢真正死因……但要長者喺人生最後日子都要經歷分離之痛，我難辭其咎」。