一年一度嘅大型選美又完結，呢個選美都算犀利，歷年來不單止製造無數花旦，就算係攞到獎嘅女仔之後組成嘅「同學會」，都好有名兼有一定影響力。不過咁，就算我姐匙縱橫娛圈咁多年，都唔知原來甚至頭三甲都唔會自動成為會員，入會係要申請嘅。
就講一直身家清白嘅「芭比」，比賽以大熱勝出，出咗嚟之後發展都唔錯，形象又大方得體，但係攞到三甲咁多年，竟然都未有機會入同學會。早前芭比去一個名流派對，見到個會嘅中流砥柱「凱倫」，兩人又份屬好友，凱倫就忽然問起芭比有冇興趣入會。芭比為咗畀面，就順口話有，於是凱倫就話過幾日安排佢面試，芭比一聽到已經想大嗌：「吓！仲要面試？」不過佢吞咗落肚。
芭比諗過面試都應該只係傾吓偈，點知去到現場，竟然見到三個師姐正襟危坐喺佢對面，其中「蓮子」仲好似審犯咁，起勢逐條緋聞咁問芭比，又起晒底，芭比當堂頂住道氣，梗係啦，蓮子啲臭史多過佢三倍。芭比當場想鬧佢，不過最後又忍住咗，之後芭比惟有同凱倫講：「其實個會都唔係好啱我。」凱倫猛咁追問佢原因，覺得好可惜，芭比惟有苦笑，都唔知講乜好。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。