【學生前路】
【本報訊】最難過是中秋，21歲Leon（化名）因為「反送中」與家人鬧翻，近三個月沒有同枱吃飯，有晚他在窗邊大叫「光復香港」遭趕出門，一身睡衣流落街頭，惟有去麥當勞做了一晚「麥難民」。原本今年9月升讀大專課程，但家人不支援學費，面臨輟學。他說，舊時中秋一家歡聚吃飯，不敢想像今晚怎樣過，「中秋節講究屋企人團圓，但你同屋企人關係咁樣，你今個中秋節點過呢？」
記者：潘柏林 攝影：黎樹雄
反送中運動之初，Leon仍能與家人理性討論，隨着事態升級，雙方矛盾加劇，「（警察）毆打示威者，令示威者骨折，明知警察做錯嘢，但佢都堅持相信警察係啱。」日常電視新聞畫面亦成為爭吵的火藥引，「可能電視直播個示威者已經傷晒，跟住佢仲講啱㗎啦，打死晒啲示威者，曱甴嚟、暴徒嚟……去到呢啲位好難忍住唔講嘢囉！」
喊「光復香港」遭趕出門
Leon曾經響應網民呼籲，晚上10時在窗邊叫口號，家人隨即衝前制止和趕他出門，「（家人）問我係咪黐咗線，有乜問題呀？點解你要做呢啲嘢呀？」他一身睡衣在公園繼續和應樓上居民的呼喊。活動完結後，一個人去麥當勞坐通宵，「喊，表面就喊唔出囉，但個心就不停咁喊。心裏面係咁喊囉！點解咁唔理解呀？點解會有啲咁嘅對待？點解人哋屋企咁支持佢仔女決定？點解我屋企係咁？」
家人之間關係越發冷淡，彼此不打招呼，甚至不會留飯，「你自己煮個杯麵，或者你見到廚房有乜自己煮嚟食吓，總之佢唔會再幫你任何嘢。」Leon在7月收到大專院校升學通知，曾經向家人詢問交學費和申請學貸問題，但未獲回應，「變咗人哋讀緊書嘅時候，我自己𠵱家就諗唔到可以做咩，好似空白咗，嘥緊時間。」
苦籌學費未知前路
民主黨立法會議員鄺俊宇近期收到Leon求助後，游說院校給予機會，「呢個年輕人，𠵱家佢係喺人生最關鍵一年，究竟佢係咪可以升學落去？呢個時間希望大家能夠伸出援手。」他呼籲家人要互相體諒，不值得因為林鄭月娥政權影響關係。
Leon現時籌措第一學期學費，亦向院校補交申請，惟入學手續仍有阻滯，輟學陰霾未散。他覺得今年中秋節畢生難忘，「雖然我知道今個星期五就係（中秋節），但真係諗都唔夠膽諗。」
昔日中秋一家歡樂團聚，今晚飯桌是否還有自己一席成疑。他說未來不會放棄家庭關係，希望一家能心平氣和吃一頓飯。
回顧過去三個月，Leon說，很多人在家避談政治，甚至隱瞞家人參加示威，直至「爆煲」為止。他想提醒同路人，當分歧未到嚴重時，溝通非常重要，大家要互相依靠，「當大家乜人都冇嗰時，就得返自己手足，咁嗰時大家可以成為屋企人。」
