林鄭御駕親征，蒞臨港鐵中環站慰問容易受傷的入閘機，側聞離地女皇終於學會使用八達通，雖然姍姍來遲，「聽到嘟嘟聲，停低你至精」的溫馨提示已成絕響，老來能夠走出機械人衣櫃，坦然公佈只對冰冷的非人類具同理心，真愚婦可教也。可能怠工期間宮鬥劇煲得多吧，甚至展現了少少由前朝奸妃啟蒙的道德美感，滿腦性幻想的羅門范婦道聽塗說散播惡毒謠言，向來優雅的旗袍衣架子不惜高抬貴手，大大力摑佢一把，份屬好姊妹都咁話，誠如張愛玲話齋，「同行相妒，似乎是不可避免的，何況都是女人──所有的女人都是同行」。張女士其他金句你可以當耳邊風，唯獨這句不可質疑，事關我們多年後閱讀《小團圓》得悉，她筆下那個同行蘇青，曾經瞞住閨密同閨密個漢奸老公開波，日防夜防豬隊友難防啊，席真係早割早着，以范婦對提供免費性交之嚮往及入迷，慢吓手搞埋阿白襪仔你話點算好？
嗱嗱，先小人後君子啊吓，上文每隻字都未曾fact check㗎吓，信不信由你。以下這段，來源是我朋友的朋友個阿媽個契家佬，佢話嗰晚路經上亞厘畢道忽然急尿，企響籬笆旁解放，聽到有把哀怨女聲響度吟吟噚噚：「班馬騮真係睇少陣都唔得嘅，淨係掛住玩自己支伸縮棍，返工玩，放咗工仲繼續玩，本宮明明下過聖旨，要佢哋日日四點同我清理垃圾，點知係咁意hea做咗個零月，居然夠膽劈砲，人哋唐明皇迷戀楊娘娘，就話從此君王不早朝啫，啲陰濕鬼唔係中意拉啲後生仔揸人膥袋咩，莫非實踐『春從春遊夜專夜』攰得滯，下晝都起唔到身乎？」