近日《願榮光歸香港》呢首香港民眾抗爭歌曲hit爆香港，各區都有市民自發出嚟唱，連海外人士都關注，美國共和黨海外事務組織副主席俞懷松（Solomon Yue）想搵寫《榮光》創作人。對藍絲嚟講呢啲咁成功嘅文宣一定做唔到，不過佢哋話晒愛國人士，自然深懂中國國技，即係自己做唔出唔緊要，咪偷嚟求其改少少，當自己「創作」囉！但今次最離譜係，班藍絲竟將成首《榮光》直接偷嚟當撐警歌用！
歌詞字幕改「警察使命」
話說噚日有網民發現YouTube出現一條「《願榮光歸香港》MV警察版」，入面首歌直接偷《榮光》，連搵人唱過都懶，而畫面就換晒撐警撐政府片，最離譜係唱緊「同行兒女為正義時代革命」，佢就將歌詞字幕改成「同行兒女為正義『警察使命』」，偷完嘢仲要明屈明搶！
咁都未算最無恥，上載人仲要耍無賴，喺條片介紹寫，「我肯定正評一定比負評多！證明中國才是對的！讓正負評給大家一個結論！」之後又發爛渣叫「賣港賊不要再給負評」，到噚晚負評已去到1.3萬，正評只有144個！所謂愛國愛港人士，竟是如此低水平，難怪大批網民留言狂鬧，「中國四大發明『偷呃拐騙』果然唔係流㗎！一個專出盜版的國家偷人首歌，果然唔會面紅，果然夠厚顏無恥」、「淨係識偷人首歌。咁又係嘅，你哋根本冇才華寫到首歌出嚟」。
連大陸網民都留言恥與為伍：「哈哈，真不要臉，我一個大陸人都看不下去了。你偷別人的歌，摻雜自己的私貨。煽動別人給你點讚，指罵所有不給你點讚的。」
李八方