曼城前隊長高柏尼今夏離開咗「藍月」，返咗家鄉比利時球會安德列治做球員兼教練；曼城一早安排咗喺禮拜三晚，趁國際賽幫高柏尼搞場紀念賽，由曼城傳奇隊鬥英超傳奇隊。雖然今場波星光熠熠，曼城呢邊有阿古路、比拿美同拿斯尼上陣，英超傳奇隊卡士仲勁，連同市宿敵、踢過曼聯嘅史高斯、加利尼維利、尹佩斯同雲達沙等都畀面參加。點知就係主角高柏尼冇落場，佢喺賽前宣佈因傷缺陣，自嘲話係「典型高柏尼」。最終兩隊踢成2:2平手，和氣收場。
曼城主席話起雕像表揚
雖然高柏尼今場冇上陣，但賽前曼城仍然為佢舉辦咗好多紀念儀式，其中以高柏尼嘅名嚟命名、通往訓練場嘅一段路舉行咗揭幕儀式，路牌上仲印有高柏尼喺2012年曼市打吡後入波嘅慶祝相，曼城主席穆巴拉克仲同埋高柏尼嘅屋企人一齊出席，穆巴拉克又宣佈會為高柏尼起個雕像，表揚佢對曼城嘅貢獻。
美中不足嘅係，高柏尼喺周三紀念賽賽前宣佈有傷踢唔到，佢仲自嘲話：「好唔好彩，我喺今晚唔會上陣，真係符合晒我嘅特點，我通常喺季尾都會受傷，家陣我腿筋有啲傷，唔想冒險喇。」雖然高柏尼最後一分鐘都冇踢，不過仍然吸引咗超過50,000人嚟到伊蒂哈德航空球場睇波，開波只係兩分鐘，馬田柏杜夫就幫曼城傳奇隊先開紀錄，不過羅比堅尼喺33分鐘幫英超明星隊扳平，兩隊半場踢成1:1。
魔迷掛住勁爆尹佩斯
換邊後三分鐘，尹佩斯禁區外射入靚波幫英超明星隊反先，不過馬華路禾尼喺89分鐘頭槌破網，結果兩隊踢成2:2，和氣收場。其中今夏先至退休、今場交出一傳一射嘅尹佩斯，雖然已經36歲，但仲踢得好出色，唔少曼聯球迷甚至認為，紅魔鬼應該簽番尹佩斯，解決球隊嘅前鋒荒。另外，今場有份上陣嘅前魔將史高斯，雖然都已經44歲，但仲係寶刀未老，有球傳波勁靚，就連前曼聯隊友里奧費迪南都喺twitter度，同網民一齊讚揚呢位昔日英格蘭中場大師。
