港豬年中關注大事，過去肯定係睇實蘋果公司發表新iPhone，然後留意行情，睇吓要唔要落柯打換機，又或者預留時間搶貨賺外快，但星期三凌晨蘋果發佈會，遇上香港場逆權運動仍然如火如荼，八方唔少朋友第二朝都喺社交網站自嘲，已經脫離港豬行列，事關成朝都見唔到有新iPhone相關帖文，估計因為fb認為大家唔關心，又或者已經離開追iPhone嘅同溫層有關。
三鏡頭如防毒面罩
新iPhone冇咩驚喜，但網民就覺得同抗爭運動好有關係，單係iPhone 11 Pro嗰四隻色，已經秒速被二創為「打獲（鑊）金」、「警察黑」、「元朗白」同「防暴綠」（圖），但就嫌少咗隻「速龍藍」囉。至於機後新設計嘅三個鏡頭，大家幻想力同樣嚇八方一跳，認為代表住催淚彈、布袋彈同橡膠子彈，甚至有人話同警察個防毒面罩睇落一樣，咁大家實有集體恐慌唔敢入手啦！至於popo同屋企人，八方就建議唔好用外國勢力產品，都係用華X、小X先襯得起你哋呀！