相嗌唔好口，唔學「褲」校長咁爛口，許多人以滷味代老母，周街派，對敵人謾罵、對朋友慨嘆，皆以「你滷味」打開話匣子。筆者饞嘴，愈聽愈想食，孩子問：「乜滷味食得咩？」
何止，我敢說，三十歲以下讀者都會搞錯。網上搜圖，常常與滷水混淆，key入「滷水 生腸」才明白。我指的滷味是橙澄澄，主打生腸、雞腳、豬耳、豬頭肉以至原隻豬鼻！顏色與啡啡的滷水大不同。那鮮艷，小時候覺得吸引，今日觀念當然顧慮到色素，唉。
孩子還有諸多指鹿為馬，為父者遂科普一下：
燒味不同燒賣，意即中式BBQ，關鍵在燒，燒鵝、叉燒、燒豬，卻何以包含不經燒烤的白切雞呢？天曉得。
臘味，以鹹為主，冬天才吃。孩子只知臘腸、膶腸，麥兜話「香港運動員唔係臘鴨」，小朋友已經唔識笑，其實至少還有臘肉，大陸名產臘全狗。
燒臘，望文生義乃燒味加臘味，但很多寫住「燒臘店」的，根本純賣燒味，自己都數典忘祖了。
海味，新一代一聞蠔豉怕怕，以為屎，遑論不知淡菜唔係菜。矜貴的，鮑參翅肚，鮑魚當然愛。參呢，多數以為人參，見到海參實物人細鬼大地賊笑。翅，環保禁食。肚，又搞錯，以為豬肚或牛肚，答魚肚都錯，正確係鰵魚魚鰾（用來控制浮沉的器官）曬乾，別稱花膠，以雄性為佳，故此公肚並非公公個肚腩。
滷味，見上文，沾芥辣吃，橙撞黃，極搶爆，現況最為式微，但最多人講。
滷水，在潮州打冷店吃，以滷水鵝、掌翼、豆腐為主，注意，同豉油皇雞翼又唔同呀！
燒味燒臘臘味海味滷味滷水，文字接龍咁刁鑽，識得分晒的考生，文化科應該畀個5**佢。以上僅只香港叫法，未計華埠、台灣和大陸各地種種同名異體、同體異名。
前綴加個齋字，諸如：齋滷味、齋燒鵝、齋叉燒、齋腸（今次指腸粉）、齋鮑魚，更幻成幾十種變化。港孩寧願食麥當勞，簡單直接。
回頭說，爸爸再教孩子：為什麼以「滷味」代替「老母」呢？因為滷老同音，味與母聲母同屬M。當然，斯文些可講「你老闆」或「識你老鼠」，母、味（以上變調）、闆和鼠，在粵語九聲中均屬陰上。
博大精深啊！文化科不考這些生活情趣而考超離地，難怪執笠。
播國歌前介紹書法、刺繡咁陽春白雪，民以食為先，不如字正腔圓講句：「中國滷味，源遠流長……」