最近同一班唔使做的正牌闊太傾開，在這個「經濟嚴冬」，對她們到底有沒有影響，如果有，又是甚麼。
話說有日下午，她們相約在中環Landmark shopping，突然有廣播及商場職員通知，由於商場附近有大型公眾活動，要立即關閉。她們連就近的金鐘都唔敢去，唯有行遠啲落銅鑼灣Times Square食個High tea。點知，甫坐下叫了個下午茶set，該商場竟然作出了一模一樣的宣佈，最終落得購物不成，Tea也未飲，乖乖哋返屋企算罷。
最近的港島區，示威處處，但凡有警察，定必起衝突，似乎遺失了一方靜土，也鮮有一刻寧靜。根據這班闊太所講，她們有個趨勢，就係漸漸離開港島主戰場，轉去尖沙咀的大型商場同酒店。不知位於尖沙咀一帶的大型商場及五星級酒店，有沒有做好一大堆吸引及迎接這些闊太口胃的產品、食品、推廣活動及優惠呢？其實不一定要減價，反而推出季節限定以花為題的甜品自助餐，搭配Perrier Jouet限量香檳和vintage手造酒杯；又可以四人同行，酒店晚飯消費就乾脆送間套房，好讓閨蜜傾個痛快；旅行社更加可以搞多啲短線貴價旅行團，品味豪遊東京、首爾之類……這似乎是一種逆市商機，大家不妨盡情思考，的確值得一做。
我們做市場推廣，每年老闆批咗多少財務預算，有理冇理，在財政年度結束前，肯定要將所有錢用完。如果使剩錢，去到下一年度，就會面臨budget cut的危機，這個是marketing 101吧。同一個道理，應用於一眾闊太亦一樣。有位闊太朋友講，無論個市有幾差，老公每月付出了的家用又或者慣常碌卡的金額總計，在這段期間，都要保持均值，不要多，更萬萬不可減少。如此一來，振興經濟，毋須靠大陸人，而是靠闊太們。
在眾多受影響的消費群中，最後才需要做到省錢過緊日子的，大概也就是這一些闊太們了。
文迪晞
mailto:[email protected]