唔好以為只有電影情節先有「原告變被告」，今時今日嘅香港甚至遠在巴西，都有機會發生呢種情況。巴西警方禮拜二就話，之前指控被巴西球星尼馬強姦嘅女模Najila，涉嫌誹謗、敲詐勒索一名世界知名球星，遭巴西警方正式落案起訴，睇嚟都一身蟻！已經甩身嘅尼馬都唔見得幾好，事關禮拜二佢代表巴西鬥秘魯後備上陣又插水，結果巴西仲要輸埋波，唔知今夏鬧轉會唔成嘅尼馬，過幾日返到球會巴黎聖日耳門（PSG）之後，會唔會又冇波踢要坐冷板呢？
話說今年六月初，Najila喺巴西警局指控尼馬，喺五月於巴黎一間酒店將佢強姦，雖然Najila認自己係自願飛去巴黎同尼馬發生關係，但唔鍾意尼馬唔用安全套，仲話尼馬後嚟夾硬嚟，但尼馬就當然否認喇！後嚟當地檢察官就話，Najila冇同警方提供聲稱擁有尼馬打佢嘅片，又唔肯畀警方查電腦同手機，醫療報告亦話Najila只係手指受傷，無法證明佢係被強姦，結果最終因證據不足而銷案。事隔一排，巴西警方禮拜二決定以涉嫌誹謗、敲詐勒索等罪行起訴Najila，仲告埋Najila嘅前夫涉嫌喺網上發佈色情內容，唔知係咪因為得罪咗勢力人士而被秋後算賬呢？
友賽負秘魯又插水
已經甩身嘅尼馬，喺上周六貢獻一傳一射幫巴西逼和哥倫比亞，禮拜二巴西喺美國約戰秘魯，或者教練迪堤擔心尼馬體能唔夠先列後備，但巴西仲有菲臘比古天奴、羅拔圖法明奴等人踢正選，點知攻勢冇腳到肉，下半場巴西見勢色唔對，喺63分鐘換入尼馬，點知呢位仁兄死性不改，喺75分鐘明明殺入禁區有機會埋門佢就選擇插水，球證梗係唔吹12碼喇！最終秘魯喺85分鐘，由路爾斯阿巴蘭接應右路罰球傳中，快過巴西門將艾達臣摩拉斯一步破網，幫秘魯爆冷一球小勝巴西。
返PSG或又要坐冷板
踢完今場波大家可能見唔到尼馬一排，事關佢要返到一直雪藏佢嘅球會PSG報到。佢老竇近日就爆料，話尼馬作為一名巴西人，只想去自己開心嘅地方踢波，佢聽到巴塞隆拿嘅朋友嗌佢返去都好感動，但尼馬合約中冇解約條款，所以轉會最終都傾唔成，冇心情踢波嘅尼馬，可能會繼續被PSG雪到硬囉！