阿根廷周二友賽墨西哥，喺球王美斯因傷缺陣下，靠國際米蘭射手拿達路馬天尼斯大發神威，個人演帽子戲法仲令對方犯手球，助阿根廷上半場已轟入四球，全場亦以同樣比數4:0狂數中美洲勁旅墨西哥，睇嚟阿根廷就算失去美斯，都搵到進攻旗手。今場波去到17同22分鐘，馬天尼斯已兩度射破「Sam哥」奧祖亞嘅十指關。32分鐘，馬天尼斯傳中禁區，個波省中對方守將卡路士沙些度隻手，球證判罰12碼，由里安度柏利迪斯操刀破網，令阿根廷領先至3:0。39分鐘，馬天尼斯又射破對手大門大演帽子戲法，助阿根廷上半場已領先四球。下半場雙方再冇紀錄，結果阿根廷維持4:0完場。