自反送中運動開始，好多市民除咗靠主流媒體得到消息，fb、TG同各大討論區都係獲得消息渠道，但有時消息未經核實，隨時係fake news，令大家集體炒車。好似噚日網上流傳一則疑似彭博消息，話引述《南華早報》報道，政府會回應民間「其他訴求」假新聞，再加埋差人突然取消4點記者會，就令好多人炒車，以為政府接納搞獨立調查委員會。
警突取消記招似層層
噚日朝早網傳多幅疑似彭博通訊社終端機嘅畫面截圖，聲稱彭博以「Market Chatter」形式發表「突發新聞」，話引述《南華早報》指港府下午4時回應「其他訴求」，好多人估政府係咪接納搞獨立調查委員會？更有傳政府4點開記者會宣佈，正當傳聞滿天飛，差人又忽然宣佈取消原訂4點記招，更加令傳聞似層層。
不過好快彭博、《南早》否認曾發表相關報道，截圖係假嘅，特首辦亦話冇喺4點開記者會，呢個時候又傳其實4點個記者會係講政府同發展商收購土地，但發展局好快否認，原來全部係流料！至於差人為乜取消4點記招？差人喺fb解釋，過去五星期每日記者會，原本為過去24小時或周末發生過重要事件向傳媒同市民交代，未來將改成按需要喎！