世界知名足球遊戲《FIFA》月尾就會推出全新一集嘅《FIFA20》，機迷當然期待啦！遊戲廠商EA禮拜一就公佈咗全新一集FIFA能力值最高嘅100位球員，結果巴塞隆拿前鋒美斯以綜合數值94，力壓老對手基斯坦奴朗拿度（C朗），成為新一集嘅數值王。
C朗數值不及有陰謀
事實上，過去多年嘅FIFA數值王，一直都係呢兩位球王，新一集都唔例外，美斯綜合數值94排第1，C朗就以93排第2。
其中美斯雖然同上一集一樣獲得94評分，但速度就下降到87，射門反而升到92，防守、傳球、身體對抗都有提高；反而美斯一向最大勁敵C朗，綜合數值下跌之外，盤球同身體對抗數值都比上集下降，有陰謀論話因為C朗踢緊嘅祖雲達斯，今年過檔成為咗《FIFA》對手《PES》嘅代言球隊，所以C朗保唔住數值王嘅地位。緊隨兩位球王嘅，有綜合數值92嘅巴西前鋒尼馬，同綜合數值91嘅比利時翼鋒夏薩特。
VVD飛躍最高分DF
另外，上季大放異彩、金球獎大熱利物浦嘅荷蘭中堅華基爾雲迪積克（VVD），今季綜合數值由上集嘅85急增至90，排名亦由上季嘅82位升到第7，成為遊戲中數值最高後衞，可以話係對佢過去一年出色表現嘅肯定。
講完game不如講番現實，正所謂人紅是非多，美斯近期先被踢爆佢同巴塞嘅合約入面，有個條款可以自己揀隨時走人，英超球會阿仙奴嘅球迷，隨即喺網上呼籲球會試吓簽美斯，但原來早喺2003年，阿仙奴已經有機會簽美斯！
前槍手領隊雲格近日接受BeIN Sports訪問就話：「我執教生涯最大嘅遺憾，就係當年簽唔到美斯！2003年我哋買咗法比加斯，同時同巴塞傾緊想買埋美斯同碧基，當時阿仙奴規模唔差，可惜美斯最後留喺西班牙，碧基就去咗曼聯，如果佢哋嚟晒，阿仙奴就會係一支好好嘅球隊。」
雲格冇講錯㗎，事關美斯繼力壓C朗同VVD成為FIFA數值王後，禮拜一仲喺ig發帖，話收到ESPY年度最佳男子足球員獎項，美斯仲多謝每個投佢票嘅人呢！