資深音樂人及電視、電影製作人陳家蓀移居加拿大多年，於當地時間9月8日病逝，享年73歲。陳家蓀係孫泳恩第一任丈夫，亦係苗可秀胞兄，曾做《歡樂今宵》編導，監製過《點只咁簡單》等受歡迎節目，喺《點只咁簡單》中成功為蕭芳芳構思出儍大姐林亞珍形象。
林嘉華感愕然
《蘋果》前晚致電陳家蓀好友、喺多倫多嘅林嘉華，佢話：「陳家蓀係我多倫多電台同事，佢主持《一起走過的日子》音樂節目，有好多聽眾。個幾月前佢請咗假，但冇人知佢有病，所以大家知道佢走咗都好愕然。我同佢80年代拍廣告認識，之後大家喺電台做，所以成日見面，聽到佢離開咗，梗係好突然、好可惜啦。」
陳家蓀曾加入泰迪羅賓嘅「Teddy Robin and The Playboys」夾band，泰迪羅賓噚日接受電話訪問時表現難過，佢話：「我哋好老友，我舊年去多倫多同佢有聯絡，我哋仲講笑話復出㖭。」講到陳家蓀加入無綫做幕後，佢話：「同我完全一樣囉，佢遲我三個月之嘛，我哋68年喺TVB做青年節目《Star Show》，69年我哋喺邵先生（邵逸夫）手上邊攞過兩呎高嘅金獎，我哋係收視第二節目，第一就係《歡樂今宵》。」
泰迪羅賓：功臣
泰迪羅賓指陳家蓀死訊突然：「估唔到，因為佢係完全冇迹象，我覺得唔係好舒服。」佢指陳家蓀熱愛音樂，而且係一個娛樂界嘅功臣：「阿Lam（林子祥）第一部戲《摩登土佬》係佢拍，70、80年代佢係香港嘅名導演，70年代係佢嘅電視年代，做得相當好。」
撰文：馮仁昭