香港人喺反送中運動中實行「自己人權自己救」，各行各業不遺餘力，法律界兩度為此舉行黑衣遊行，好多重量級人馬由「送中」條例一出台，已經四出解說力阻惡法。國際律師協會International Bar Association（IBA）宣佈頒發2019年度「法律執業者人權領域傑出貢獻獎」畀資深大律師、民主黨創黨主席李柱銘同公民黨大律師吳靄儀，係獎項設立24年來首次出現「雙冠軍」，兩人共同獲獎。
馬丁同Margaret發表聯合得獎聲明，好謙虛咁話個獎唔係表揚佢哋個人成就，佢哋只係代表所有喺艱難環境下，竭力維護法治嘅香港大律師接受獎項。
IBA主席讚堅定護民主
IBA主席Horacio Bernardes Neto盛讚兩人喺香港目前動盪局勢下，仍堅定不移致力推動民主和人權，令人欽佩。查實馬丁同Margaret為咗反送中，又訪英又訪美，頻頻撲撲出席唔少場合講解，相信個獎亦係對一眾反送中香港人嘅肯定，真係教「撐修例、護法治」嘅人，情何以堪？呢個獎項會喺本月26日喺韓國首爾舉行嘅IBA年會期間頒授。