現年39歲嘅方力申嚟緊11月5日挑戰45公里慈善環島泳，為45萬名缺乏潔淨食水嘅貧困人口籌款，目標籌450萬。為咗積極備戰，小方目前作息定時，注意飲食健康同戒酒，上個月佢喺記招度仲講笑，話要游足45公里，差唔多要12個鐘，怕到時要大便就麻煩。𠵱家小方一星期練習六次，點知噚日晨早5點，佢出海練水嗰陣就練到狂嘔。
盼多多捐款
噚日小方喺Ig分享兩條自拍短片，第一條片見到佢喺海中心曬住咁話：「大家好，仲有差唔多兩公里就到淺水灣，我兩公里之前，跟隊友講拜拜，其實唔畀一個人游，但係我頭先都講過好頭痛，咁頭痛喺海再等就更加暈，因為啲海浪，我話唔得，我寧願慢慢游，你哋一陣追到我就追，如果再停喺度再曬住，我塊面又曬到有啲痛，我唔掂我會嘔，其實我𠵱家都可以嘔。」'
之後喺另一條片中，小方面露難色咁扣喉，之後立即噴射式狂嘔，前後總共嘔咗四次，佢留言話：「游到嘔：Warning……以上片段會引起觀眾不安，反胃甚至想嘔，因為片段拍攝到我在海中嘔吐的過程，不想看的請別swipe left看下一段視頻。游海真係唔簡單，容易脫水容易中暑容易嘔，點解我要咁辛苦，同情我請捐款。」不少網友留言為佢打氣加油，仲話會捐款支持。其實，小方未入行前曾經係香港游泳代表，參戰過2000年澳洲悉尼奧運，曾經擁有過香港九項游泳紀錄。
撰文：馮仁昭
