反送中運動燒足三個月，但專制政權唔處理問題，反而去解決提出問題嘅人，令全城瀰漫一片白色恐怖，就連外傭都做埋磨心！近日喺印尼外傭圈子流傳，印尼當地傳媒上月底居然報道咗689牽頭搞嘅「803行動」篤灰網，變相鼓勵印傭去舉報自己僱主攞獎金。
影頭盔相舉報冇用
呢單報料就由八方「朋友個朋友」嘅外傭提供，佢話剛過去周末，喺印傭聚集嘅熱門地點見到有印尼文海報，內容係叫佢哋提供示威者嘅資料，或者如果知道自己做嘢屋企個僱主有參加示威，都可以提供資料，仲講明唔會免費白做，因為會有錢收，學羅范所講，八方「相信已經確認係真有其事」。
根據八方聽番嚟嘅消息，有外傭真係被誤導，影咗自己僱主張電費單同屋企啲頭盔口罩相去舉報，但呢啲資料根本證明唔到乜，所以當然冇錢收啦，實在令人感到悲哀。家陣僱主落街要驚遇到popo隨時被捕，但返到屋企都未必安全，提防有鬼，咁落去肯定會影響僱傭關係，仲再次驗證689最拿手，果然係令香港撕裂。
李八方