逆權運動下的深水埗，成催淚彈放題社區，對於在該區成長住過23年的「深水埗仔」馬浚偉來說，仍深愛這個娘家，馬仔表示自己沒足夠智慧分析現況，但無論發生甚麼事，他承諾不會離開香港。馬仔日前現身深水埗，受街坊歡迎，他感激大家愛戴，同時勸勉後輩：「觀眾同街坊鍾意你，先有存在價值，亦證明你演藝生涯冇白費。」
英雄莫問出處，現年47歲的馬浚偉卻從不避談自己是「鐵一般的深水埗仔」，他由出世到23歲時都在該區成長，他坦言對深水埗有深厚感情，不時返去尋找舊日足迹。
兼職幫補家計
生於基層家庭的馬仔，父親是九巴車長，母親是製衣業工人，他是家中唯一男丁，上有三姊、下有一妹，一家七口住在白田邨公屋，馬仔由幼稚園、小學到中學都在深水埗就讀。他說：「從小行路返學、放學，平常生活都喺附近。」馬仔為幫補家計，中三放學便到尖沙嘴雪糕站做兼職，一做三年，中學畢業後本獲老師推薦入理工修讀設計，因家貧交不起學費被迫到社會工作，他先後做過出版社和賣塑膠。馬仔喜歡唱歌，但從沒想過要加入娛樂圈，但他卻會參加各大小歌唱比賽挑戰，終於在93年「第3屆先鋒歌唱比賽」奪冠，成為歌手的入行踏腳石，幾年後成為電視小生，演藝路變得更暢順。
馬仔甫出現深水埗街頭，街坊即簇擁上前，異口同聲表示鍾意看他的劇集，原來馬仔迷暈「師奶」是演技而非歌聲，他說：「我已完全接受，大家當咗馬浚偉係演員，佢哋可能都知我有唱劇集主題曲，但唔知我曾係出碟嗰種歌手，我都慣咗。」
觀眾是藝人的「米飯班主」，馬仔樂於跟街坊互動：「我成日同啲新入行嘅講，街坊認得你，同你影相打招呼，你要好好珍惜，街坊鍾意你，我唔會嫌人哋擁住，千祈唔好偷偷影我，因為唔靚仔。觀眾同街坊鍾意你，先有存在價值，亦證明你演藝生涯冇白費。如果出到街觀眾唔想同我影相，見到我就雞飛狗走，咁我要檢討吓。我自問到𠵱家都只係一個普通人，藝人只係職業，我依然係深水埗嗰條𡃁仔。」
回饋弱勢社群
馬仔指深水埗是娘家：「我出世到23歲冇離開過，感情特別深，入咗娛樂圈，生活改善咗先同家人搬離。我對呢度心態冇離開過，我都知𠵱家社會氛圍，大家好緊張同唔開心，人與人之間距離遠咗，無論係點，我唔會抗拒嚟深水埗。我每日都有睇新聞，每日都禱告，我冇足夠智慧去分析𠵱家情況，但我愛呢個地方，無論發生乜嘢事，我都唔會離開香港，唔會離開我成長嘅家。」馬仔已有多個計劃出錢出力幫助各區的弱勢社群，他說：「既然社會同電視台畀咗知名度我，𠵱家我都唔細，唔係只想發展自己演藝事業同生意，我想直接走入社區做多啲活動，回饋社會。」
刪歌唱《放學ICU》
馬浚偉於下月底到11月初在灣仔演藝學院舉行七場演唱會，由於是他入行26年來的第一次，當然高度重視，問到是否要練氣？他說：「每年我喺美加登台都會唱十幾、二十首歌，都算演唱會形式，今次個人名義開騷都冇乜嘢難度，平日都有練氣。」他反而覺得揀歌最難，尤其近日大家都提出要唱《放學ICU》主題曲，他說：「太多歌想唱，好辛苦篩剩二十幾首，已同音樂總監講cut一首歌，插番《放學ICU》入去。」
提到演唱會賣點，馬仔笑說：「唔好諗我會賣肌肉同舞蹈，呢啲唔關我事。今次舞台揼本設計咗video wall，好多電腦效果，我仲想同大家傾偈。」馬仔表示舞台設計可以走近觀眾。演唱會主題叫「Dream Big」，顧名思義有一個環節讓人追夢，馬仔挑選了四組有演藝潛質的素人上台一展所長。
撰文：比華利
攝影：仇志德