【本報訊】反送中運動持續，特首林鄭月娥遲遲才撤回《逃犯條例》修訂，零售業重創幾成定局。華人置業（127）大股東劉鑾雄，旗下多個商場主要在重災區銅鑼灣，其中銅鑼灣東角Laforet有商戶生意大挫九成，逾20商戶月初發出聯署信，要求減租五成以自救。銅鑼灣地帶內，吉舖湧現；在同一條街的皇室堡，瑞典時裝品牌Monki及卡啦OK Red MR，近月亦已不續租上址。
租戶呻生意跌九成
「一日得三個客，仲要齋睇唔買，一個月賺埋都未夠交租，點捱落去？」銅鑼灣東角Laforet商戶杜小姐指：「我間舖月租要三萬幾蚊，生意暴跌九成。已經唔係減價吸客嘅問題，而係成個場冇人行。要求業主減租，已經係當務之急。」
杜小姐又謂，「雖然東角Laforet近日已發信，豁免9月至11月幾千蚊管理費同推廣費，但睇返目前咁水深火熱營商情況，呢個措施力度不足」。故其現已連同近20租戶，本月3日發起聯署，要求業主即時連續半年減租50％，及寬限延期繳交租金及豁免利息。同時更在櫥窗貼上「要求減租」、「共渡難關」等字句。
另一時裝店負責人程小姐亦指，商場每逢示威遊行都落閘，加上旅客銳減，近月生意已陷谷底。她稱情況比沙士、佔中恐怖，「如果業主唔減租，即係『攬炒』等死，對大家冇好處」。
在數步之遙的銅鑼灣地帶，記者日前實地觀察，發現樓高三層約180舖位中，營業的寥寥可數，不少店舖貼招租告示。經營銅鑼灣地帶商舖租務的余女士指：「現在本身係租舖旺季，啲人準備開舖，做聖誕嗰浸生意；如今囤積咗好多吉舖喺度。有近50平方呎舖頭，劈到月租3,000蚊都冇人租。」
在同一條街，屬大劉情意結的皇室堡亦開始現吉舖。據保安人員透露，瑞典時裝品牌Monki上月起已不續租上址，「平時已經唔係好多客入去，聽講話唔想續租走人啦，但暫時未見有新舖進駐」；位於8樓的Red MR近日亦約滿轉租兆安廣場，據悉新租金平均呎價約45元，月租近100萬，租期五年。
記者：潘曦