講開林鄭月娥同班司局長落區聽民意，林鄭之前話呢個月就開始，但一直冇聲氣，民政事務局局長劉江華噚日出席一個活動後，就俾人問林鄭同班官幾時先落區對話？劉江華又係話今個月開始，但話有好多難題要處理，又話要走訪18區要花好多時間，所以諗緊點組合不同地區，又話希望持不同意見人士都可以向特首表達意見，所以要考慮點作出公開邀請，又話社會仍未到平靜階段，所以要考慮對話時候會否受干擾。
避談落區時間
講完一大堆理由，其實只係想講林鄭冇得同市民對話住、亦唔講幾時搞得成，因為所有嘢都要政府確保可控之下先得，如果係咁就即係唔使搞落區！事關區區咁多市民不滿林鄭同差人執法，佢哋見到林鄭一定大鬧，咁一係唔畀鬧政府市民參加、只比建制派喇喇隊出席，一係就惟有唔好搞，又或好似之前咁偷偷地匿埋搞！