上星期日歐國外A組，英格蘭主場鬥保加利亞，「三獅軍團」憑哈利卡尼上演「帽子戲法」，同史達寧嘅門前撞射，以4:0贏波，三戰全勝續排榜首。今場戴帽嘅卡尼喺國家隊入球總數達到25球，超越名宿靴斯，雖然同以53球排第1嘅朗尼仲有距離，但以卡尼嘅高效率，絕對有本錢挑戰做英軍入球王。
英格蘭今場強陣出擊，由熱刺嘅卡尼、曼城嘅史達寧，同曼聯嘅拉舒福特組成三叉戟。24分鐘，保加利亞門將喺自己禁區傳波被史達寧搶斷，後者即時傳中畀卡尼撞射，幫三獅半場領先一球。換邊後，拉舒福特喺禁區內被侵犯博到12碼，卡尼一射中鵠，將比分改寫成2:0；六分鐘後卡尼左路傳中，史達寧喺門前撞射得手，擴大比分至3:0。73分鐘，卡尼再博到12碼，再次操刀命中，大演帽子戲法，幫英格蘭喺主場大勝保加利亞4:0，重返A組榜首。
入25球超越名宿靴斯
卡尼家陣喺國家隊累積入25球，超越名將靴斯24球嘅紀錄，登上英格蘭射手榜第14位，不過佢目前只為國家隊上陣40場，場均入0.63球（見附表），比起射手榜頭三位嘅朗尼、卜比查爾頓同連尼加仲要高效，加上佢對上嘅13位英軍射手都退晒役，26歲嘅卡尼絕對有機會衝擊射手榜第1位，佢賽後接受訪問都話：「我希望未來可以繼續入波，當我着起英格蘭波衫，我就想入波同幫球隊，好彩今日都做得唔錯。」
修夫基讚射12碼叻豬
賽後英格蘭教練修夫基都大讚卡尼係年輕球員嘅好榜樣：「當我哋睇佢射12碼，就知佢係練咗好耐，先射入咁多球。對一位後生球員嚟講，睇到卡尼嘅成就、專業態度同喺比賽度咁落力，簡直係個不可思議嘅榜樣。12碼係可能會被救到，但卡尼有好好嘅心理質素同技巧。佢都好樂意幫其他球員創造空間，當佢有態嗰陣，佢係一位擁有頂級技術同心理質素嘅頂級射手。」