今年中秋節係星期五，中秋節翌日係星期六，變相冇咗一日補假，幾唔抵。明年2020嘅中秋節適逢10月1日星期四，10月2日應該補假唔駛返工啦，大家大可以預先策劃明年有個長周末假期去日本、台灣、泰國行吓，鬆一鬆。
每年中秋節前兩星期，節後一星期，左丁山奉旨食月餅，年輕時可吃一個蛋黃蓮蓉當早餐，現在年紀大咗，成日畀人警告唔好食咁多，於是月餅食量少咗，不過今年蔡瀾有驚喜，蔡瀾月餅有玫瑰六仁，火腿九仁兩款，體積特細，仲細過市面上最普遍見到嘅迷你奶黃月，正是一啖吃一個，加上左丁山近年喜歡五仁月，蔡瀾精品啱晒合尺，二十幾個蔡瀾月餅畀左丁山一個人食晒，還未到中秋。
現在流行奶黃月，非左丁山所喜，但家中孫女孫兒就喜歡偷食迷你奶黃，喝都喝唔住，可見奶黃月在年少族群，確係有市場嘅。傳統月餅當然係以奇華出品最多見，雙黃蓮蓉月、紅豆沙月、五仁月、十五年陳皮豆沙貢餅都好正。曾問過奇華中人，今年月餅市道如何？據講門市銷路增長甚微，因為內地遊客減少，加上目前市面情況不穩，都影響銷路嘅，但競爭先至係一個大因素，近年不少酒店、著名酒樓、會所、大公司財團均有自己月餅供送禮市場用，市面送月餅禮物嘅傳統，仍然盛行，不少人收月餅禮券收到手軟，左丁山個人亦收到唔少，既然係咁，仲使乜出街買月餅呀，月餅銷量自然受到影響。左丁山每次收到不同公司月餅，都細心睇吓鐵盒背後說明，咁就發覺幾間公司送嘅月餅，不約而同，其實都係奇華製造嘅，奇華已經由一間餅店轉型為一間月餅製造廠，做月餅OEM生意可能同賣月餅生意差不多咁大，於是乎門市生意即使因為競爭大，內地遊客減少而無增長，奇華仍然騎騎笑，睇嚟呢行月餅OEM生意有得做，其他老牌餅家實會加入競爭啫，畢竟倚賴內地客呢個大市場，有辣有唔辣，內地樣樣事情都關乎政治，政治干擾無處不在，好似Zara無端被內地五毛攻擊，京東、淘寶將「大班」月餅下架，正一小家子氣！捷克弦樂團都因為布拉格市長親台灣言論而不准到內地表演，中國興起了，財大氣粗，擺出一副順我者昌，有生意，逆我者亡，一於打殘嘅格局，好惡頂！城中大富豪有口難言也。過往幾年大量強國遊客湧到東南亞令當地酒店生意大旺，不少東南亞大城市拼命興建新酒店，點知2019年強國遊客數字大跌，東南亞酒店即刻叫苦不迭，借債多者，分分鐘陷入財困也！