好多人都見到藝人身光頸靚，出入坐靚車，其實搵朝唔得晚大有人在，就算有啲搵到錢，佢背後嘅辛酸真係講出嚟都有血有淚。好似「大尊佛」咁，就咁睇佢喺公仔箱嘅發展都幾好，叫做有個穩定節目，閒時又做吓綜藝節目，睇落搵到吓食。
其實大尊佛剛剛轉工時，都俾人玩得好慘。原來公仔箱公司內部有個不成文規定，但凡由隔籬台過檔嚟嘅員工，都要俾人玩。大尊佛諗住好易食冇乜所謂，有一次佢應邀做一個綜藝節目嘉賓，主持人之一嘅「艾飛」出晒名鍾意玩人，特別係新人。節目係以錄影形式進行，一直都進行得好順利，大尊佛全程都安然度過，以為自己大步檻過。
到錄影尾聲，就喺大尊佛唔為意嗰陣，艾飛同佢一班跟班，原來預先準備好幾桶油。到處罰環節，每人一桶油照頭淋落大尊佛身上，而佢亦諗住應咗個劫，以為啲油都係水彩之類嘅道具。當大尊佛去更衣室清潔時至知大件事，原來艾飛用髹牆嘅漆油，當年要洗甩漆油，要用火水先搞得掂，大尊佛有冤無路訴，滿腔委屈之下，喺更衣室度喊咗出嚟。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。