上個禮拜五歐國盃外圍賽C組上演咗場重頭大戰，德國同荷蘭1年之內第4次交手，今次有主場之利嘅德國，本來上半場入一球領先，但點知換邊後反勝為敗，俾橙衣軍團連轟4球反勝4:2。德國今次認真失威，一嚟佢哋長達12年嘅主場不敗金身被破，二嚟喺近兩年嘅輸波場數，仲要多過被視為歐洲魚腩嘅安道爾同盧森堡，你話教練路維今次點解釋？
早開紀錄反輸2:4
德國上半場先憑基拿比入波領先，但下半場喺對方一段8分鐘內嘅攻勢下連失2球，荷蘭先靠法蘭基迪莊追平，再有德國守將莊拿芬泰希擺烏龍反超前。雖然德國好快再由卻奧斯入12碼追平2:2，但後勁十足嘅荷蘭，之後有效力利物浦嘅韋拿杜姆一傳一射，最後奠定4:2勝局。橙衣軍團賽後雖然仲落後德國3分排呢組第3，但就少打一場。
德國今場波有多項紀錄被破，首先連續29場主場嘅不敗金身不保，對上一次喺主場輸波，已經要數到12年前，即2007年10月喺歐國外主場不敵捷克0:3。再者，德國更加俾荷蘭終結咗14場喺世盃同歐國盃外圍賽嘅連勝紀錄，德國上一次喺外圍賽輸波，已經係15年10月，當時德國隊作客輸畀愛爾蘭0:1，但隨後嘅14場外圍賽，德國攞到全勝嘅佳績。另外，今次亦係荷蘭自14年世界盃5:1大勝西班牙後，再次喺下半場攻入四球，亦係首次喺德國身上入到四球。
路維大換血冇好過
其實踏入18年後，德國喺國際賽嘅成績就一直好波動，除咗喺俄羅斯世盃分組賽以1勝2負嘅成績提早出局，18年起踢過嘅18場賽事入面，都只係得7勝4和7負嘅劣績，而當中多達三場係半場領先嘅情況下，下半場俾對手反勝。英國天空體育話，德國由18年開始，輸波場數比起歐洲魚腩部隊安道爾同盧森堡仲要多，安道爾嘅成績為13戰6負，盧森堡就16戰6負，都輸少德國一場。
教練路維喺上年失意世盃後，為球隊大換血，將湯馬士梅拿、謝路美保定同曉姆斯呢啲年紀漸大嘅主力踢出國家隊，但似乎改革後都未有好過。佢賽後亦承認荷蘭今場踢得比德國好：「我對結果感到失望，荷蘭喺90分鐘都係表現較好一隊。雖然我哋曾領先，但控制唔到場波，又攻唔入對方心臟地帶……」至於荷蘭教練朗奴高文就讚自己班球員踢得好，但亦提醒唔可以放鬆，因為離出線條路仲好遠。