周四歐國外F組西班牙作客羅馬尼亞，喺曼聯門將迪基亞冇正選下，狂牛軍團雖有沙治奧拉莫斯射入12碼，同前鋒柏高艾卡沙入波一度領先兩球，但下半場59分鐘主隊有射手安多尼頭槌破網追近1:2，加上79分鐘狂牛守將迪亞高洛蘭迪領紅，比賽尾段受壓下，搶走迪基亞正選位置嘅阿列沙巴拿加（Kepa）顯身手幾次化險為夷，證明自己有能力孭得起1號球衣。西班牙最後都保住2:1勝局，喺F組五戰全勝排榜首。不過比賽表現最好嘅門將係羅馬尼亞的泰達路辛奴，面對狂牛全場10次中門標射門救咗8次，連阿列沙巴拿加賽後都話佢打得好好，令佢印象深刻。
羅國門神狂救險球
西班牙主帥羅拔摩蘭奴賽前都話，門將位置冇必然正選，結果曼聯門神迪基亞今場要坐冷板凳，由車路士門將阿列沙巴拿加擔正。由於今仗主帥冇揀馬德里體育會兩個箭頭迪亞高哥斯達同艾華路莫拉達，今仗改派多蒙特射手柏高艾卡沙擔正，開賽六分鐘就有腳半單刀射斜，去到29分鐘阿仙奴中場丹尼施巴路斯俾對手踩跌，球證判罰12碼由隊長拉莫斯操刀破網，西班牙半場領先1:0。
下半場兩分鐘，西班牙左閘佐迪艾巴突破越位，殺入禁區地波傳中，艾卡沙輕鬆射入空門，狂牛領先到2:0。但喺59分鐘，羅馬尼亞射手安多尼接應傳中，頭槌頂爆Kepa把守嘅西班牙大門，追近到1:2令主隊燃起搶分希望，西班牙喺79分鐘仲有迪亞高洛蘭迪領紅，不過多得今場把關嘅Kepa尾段作出關鍵撲救，狂牛兵終以2:1險勝羅馬尼亞保持全勝，下周日會返主場迎戰弱隊法羅群島。雖然阿列沙巴拿表現唔錯，但論撲救次數都唔及對手泰達路辛奴八次咁多，前者賽後大讚佢表現出色，亦講到自己喺國家隊嘅地位：「無論邊個上陣都係教練話事，己隊三名門將好團結，喺操練時氣氛好好。」泰達路辛奴今季由南特轉投里昂，但喺新東家仲未喺正式比賽上陣過。
意大利反贏阿國五連勝
至於J組賽事，榜首嘅意大利作客阿美尼亞。主隊憑一次反擊由前鋒卡拉柏恩先開紀錄，但佢喺上半場尾段2黃1紅被逐出場，意大利喺攻足成個下半場下搞掂，以3:1反勝對手，外圍賽連勝走勢去到五場。同組嘅芬蘭亦以1:0小勝希臘，4勝1負得12分排第2，9月9日主場對意大利上演榜首大戰。
