【8.31直擊】
【本報訊】8.31爆發激烈警民衝突，警方承認當晚再派警員喬裝蒙面示威者，並於五分鐘內兩度在維園開槍，引起公眾譁然。翌日警方在例行記者會上，聲稱只涉兩名卧底警員權充探子，並因有「暴徒」一度想搶佩槍，警員被迫向天開槍示警。不過，當晚在維園勸示威者離開因而目擊事發經過的傳道人「袁師母」陳錦美，挺身指警方所言不盡不實。她指證在開槍前半小時先後見到至少三批喬裝成黑衣示威者的警察，分別以五人一組共15人，由維園北小徑沿告士打道抵達維園噴水池入口，直至第三批涉事警員被揭發身份，因而與示威者推撞，其間未見有人搶槍。
記者：呂麗嬋
「嘭！」槍聲劃破維園黑夜，事隔多天與記者重返事發現場，陳錦美一臉感觸。「親眼見到五個五個一組扮示威者嘅警察不斷進入維園，仲係陀住多於一款槍，警方事後嘅解釋係不知所謂，想做證人講返見到嘅事，其實當時好多人喺天后散緊，我都準備走，係喺毫無準備嘅情況下目擊到整件事」。8.31當晚，警方一早駐重兵在銅鑼灣一帶佈防，維園四周都是防暴警察，近晚上9時，大批群眾進入維園準備前往天后方向散去，因為人太多，陳錦美與友人決定抄小路，向海旁方向沿維園北走另覓出路。
“最令我奇怪嘅係佢哋好淡定，我大嗌有防暴，佢哋唔追但亦唔走。”
「條路唔係好多人，喺草叢中間突然見到五個頭盔，全部黑色，好靚好貴嗰隻，嗰五個人身形身高又差不多，我下意識大聲嗌：『有防暴警察啊！』嗰時條路得五、六個示威者，佢哋轉頭就走，淨番我同我嘅朋友，因為好奇怪，如果係防暴冇理由得五個咁少，所以想望真啲，見佢哋口罩同衣着都各有不同，冇傾偈只係喺度睇電話，但最令我奇怪嘅係佢哋好淡定，我大嗌有防暴，佢哋唔追但亦唔走……」陳錦美懷疑五人身份，遂細聲告訴身邊示威者，共識是「睇定啲」。
陳錦美不放心，折返噴水池維園入口，她說其時有約十多名示威者停留，相隔約一至兩分鐘，五人一組的黑頭盔喬裝警亦步至水池旁，「我見佢哋行入維園範圍，就主動行過去問：『你哋係示威者定係警察？』佢哋互望一眼冇人答，過一陣其中一個答：『我哋梗係示威者啦。』咁我就跟住問：『你係示威者，咁你示咩威呢？』佢哋明顯窒一窒，其中一人答：『光復香港吖嘛。』但講得好甩咳」。陳錦美笑謂對方答完仲「牙牙學語」反問：「你係咪又想割席呀？」令她失笑。
對話完結，陳謂五名疑人或見行迹敗露，不久即向電車路方向離開，但首批五人組離開後相隔不足10分鐘，她又發現另外五名裝束身形相近的「黑衣蒙面示威者」由北面小路走到噴水池，在樹前稍駐足再向電車路方向走去。「我嗰時已經高度懷疑，叫啲示威者快啲走，唔好再留，話維園太多人扮示威者，相信唔止10個……但話口未完，又有五個喺同一方向行過嚟，同我哋係好近距離，而喺呢個時候幾個示威者就行咗過去，質問佢哋係咪警察，雙方係有推撞，圍住水池由外邊推到去埋邊，我同佢哋相距一段距離，但清楚聽到大家講咩，唔想佢哋有衝突，就用佢哋慣用嘅語言嗌過去：『你留住一隻狗，就會引嚟好多隻狗過嚟，唔好留人，畀佢走啦……』」
只是說時遲那時快，已有三、四個喬裝警掙脫向海旁方向逃去，只剩一人在長凳附近，被五、六個示威者圍住。和長凳相距約十幾米，陳錦美說只見有人除下喬裝警的面罩，現場氣氛尚未算太緊張，「不斷聽到好嘈吵，圍住警察嗰啲示威者都好年輕，猛問佢係咪警察有冇委任證，有啲人攞咗佢啲嘢嚟睇，確定佢係警察，有人就大嗌真係鬼……當然如果我係嗰個警察，我都會覺得好緊張，示威者年紀比較輕，冇諗過咁嚴重，只係想證明佢係警察，影吓相然後放佢走」。陳錦美只見雙方推撞，但強調其間未見有人試圖搶槍或毆打該名警察。
「冇聽到搶警槍嘅聲音同言語對答，只係不停聽到有人問：『你哋係咪警察？有冇委任證？可唔可以畀我睇你哋嘅電話？可唔可以畀我睇你哋背囊入面有乜嘢？』講到背囊我係好擔心，因為我發現當中有人孭住嘅係唔尋常咁長嘅背囊，有可能係後來見到嘅胡椒球槍，而喺我認知裏面，便衣警察係會有槍嘅，只係大家好沉醉咁圍住佢，突然就聽到嘭一聲」。陳錦美說當時第一個反應是大嗌：「真槍呀！」有示威者亦大嗌開槍然後驚惶四散，「嗰時落緊雨，好多人跌倒，好擔心有死傷，立即向佢哋方向嘅地下望，同埋睇吓有冇人標血……」
“我當時係唔覺得示威者想打個警察，如果要打期間好多時間可以打，並唔係警方所講有大量示威者圍住佢哋。”
「警察唔好再開槍！」陳錦美再大嗌。第二下槍聲相隔幾分鐘，陳說當時已被途人推離噴水池範圍，「響第一下槍聲之後，有一個社工喺我隔籬，佢身形比較健碩，唔畀我再行前，我當時係唔覺得示威者想打個警察，如果要打期間好多時間可以打，並唔係警方所講有大量示威者圍住佢哋」。兩下槍聲之後，四、五個警察撲出，其中一個用胡椒球槍，於兩米內向示威者不斷發射，「有示威者喺天橋底被捕，嗰時落雨好多人逃跑時跌低，就我眼見，至少三至四個被捕」。
陳錦美說事後有同樣在現場的示威者主動聯絡她，「佢同我講捉到有鬼係好嬲，但唔想打警察，後來先知道原來有槍，我聽到覺得好無奈」。她反問，如果喬裝警只為驅散人群而非殺人，為何要陀槍呢？ 「警方每日四點都會開記者會，最想問點解佢哋要扮示威者呢？喺文明法治嘅社會，扮卧底查劫案販毒案，我唔係話示威者所有做嘅嘢都係合法或者非法，但佢哋唔係大賊，唔係想殺死警察，如果你咁驚要陀槍出嚟，請你唔好再扮示威者」。
