【本報訊】不時出席集會、62歲的陳錦美是正宗「黑白天鵝」，無論示威者還是警察都有勸，希望避免衝突，「雙方有危險我都希望去提醒，我畀自己嘅任務係免除大家嘅危險」。但她感覺前線執法的警察是越強但也越懦弱，「我到今日都覺得示威者唔係想傷害警察，但你打得佢哋太犀利，如果佢哋有一定人數係會還手，但都係保持住唔想對警察有太大殺傷力」。她體諒警察被10個人圍住可能感到很驚惶，但她質疑今次維園開槍是否有必要？
「究竟係如記招所講向天開槍示警，還是因為幸運所以先冇射到人？呢樣嘢一定要個警察自己講，大家都係旁觀者，但問題係冇人信林鄭講嘢、冇人信警察講嘢，香港點解要咁呢？」陳錦美說：「好多示威者同我講，話預咗被捕預咗死，唔好勸我，如果佢哋夠膽殺我，睇吓邊個撞到。我聽到係好難過，佢哋犯法你去拉佢，但拉人係有好多方式，唔係咁暴力咁唔守警例。」陳錦美公開講出當晚維園所見，已有心理準備被拘捕。
「隨時可以話我係非法集結，社工都拉，我係傳道人，喺現場勸示威者離開嘅人都拉得，喺呢個前提下，其實都可以拉埋我啦」，陳錦美越說越激動：「好多人其實都勸我，就算真係見到啲咩，唔好講啦，講咗會俾人拉㗎，講真我唔敢完全否定教友嘅勸喻，所以過去一直冇諗過企出嚟講，亦一直唔想高調接受記者訪問，但今次唔同，我覺得開槍係好嚴重，同埋有組織性大規模咁扮示威者，係應該要譴責警方同政府嘅做法。」
籲勿用同一方式打到贏
陳錦美是袁天佑牧師的太太，也是教會傳道人，在基督教界一直以敢言見稱，早在反送中運動之初，她就曾經和6,000名港媽在中環遮打花園參與集會，「我曾經喺集會裏面講過，唔想做天安門母親，呢個係我嘅心聲，我希望未發生悲劇之前，大家有一個警覺心」。
一直守護年輕人的陳錦美，過去曾經因應不同的社會議題以個人身份發起遊行，2014年雨傘運動期間多次煲湯在佔領區派發，又在旺角騷亂中站在前線呼籲警察和年輕人冷靜，結果被警棍打中。
「過去呢幾個月，我最大感受係，警察和年輕人無論係武器定心地其實都太懸殊，所以根本唔需再切磋，打嚟都冇用」，本身學太極的她又以打交作比喻，同一功夫出得太多次，對手會找到制衡方法，「和理非和勇武都有佢哋嘅表達方式，但我覺得不宜太長時間停留喺同一種表達方式，要諗吓係咪仲有其他方式都可以表達民意？我嘅睇法係打贏唔好驕傲，輸咗又唔好死硬頸，想用同一方式打到贏為止」。值得反思的是：是否一定每晚去港鐵站、每晚去警署？「轉方法其實唔代表就係輸」。
■記者呂麗嬋