【守住記憶】
【本報訊】「記憶係好脆弱嘅一樣嘢，點樣令記憶可以永恒呢？學張國榮喺《東邪西毒》講，就係唔好忘記。」反修例運動燃燒近三個月，港大畢業生黎的琛現身每場遊行集會，趕在催淚煙與子彈前，拯救文宣紙本：直幡、橫額、標語、貼紙，大大小小累積了約600件。收集，紀錄，保存，拒絕遺忘，「假設2100年個世界未完，最少會有堆人知道，2019年嘅香港發生咗乜事。」
記者：周婷
黎的琛讀人類學，對考古及香港文化情有獨鍾。反修例運動爆發以來，網上湧現大量文宣，「要攞得晒係無可能，（紙本）係由虛幻變實體，所以我會去嗰度（現場）執。」文宣主題林林總總，包括Pepe改圖、批評警察、不分化不割席、具政治隱喻的漫畫，也有相信出自年長示威者的手寫文宣。
鍾情具港特色文宣
第一次出動，黎的琛只敢收集別人派發的文宣，還蹲在垃圾桶旁，「人哋掉一張（文宣），我執起一張」，不少人覺得他鬼祟怪異。初時他會留意市民手持或貼在身上的文宣，漸漸變得主動，「佢（遊行人士）手上拎住一個無見過嘅，就問佢攞，但有時可能佢唔好意思，話出晒汗、搞到濕濕立立咁樣。」黎的琛笑言不會介意，例如8.19民陣170萬人遊行當日，港島區下着滂沱大雨，翌日他由炮台山走到金鐘，收集到一堆濕了再乾、滿佈水印的文宣，「我唔介意爛咗、濕咗，咁樣先反映佢係真實。」
黎的琛每天帶着F4大小的分層文件夾、幾本簿、大垃圾膠袋外出，「當運動繼續，你唔會想見到張嘢（文宣）但miss咗佢」，久而久之，新的、舊的朋友也會幫助他收集文宣，目前有10多位義工。黎最喜歡有香港特色的文宣，例如符咒、溪錢，也喜歡容易保存的貼紙。收集難度最高的是大型文宣，例如用索帶拴在天橋、欄杆的橫額，「無鉸剪就用鎖匙（割開索帶），但人哋睇就覺得好可疑。」
黎的琛也會盡量在警方清場、衝突爆發前收集文宣，「一來係細膽，同埋要安安全全、完完整整攞返走（文宣）」。2014年，黎的琛在金鐘被捕，他坦言不想再面對拘捕，然而每次走到現場，他都不禁反思，「會質疑自己喺運動上角色係乜？好幾年前俾人拉過，當時企到最前，都係公民頭盔加一個口罩，𠵱家企到後面都戴住個6900（防毒面罩型號）。」他自責變得懦弱，「好多人話，大家扮演唔同角色，我自己覺得都唔係真嘅，如果真係每人扮演唔同角色，咁12歲學生應係扮演學生，佢唔需要出嚟……但開咗個頭（收集文宣），都會做落去。」
目前收集到的大部份文宣，黎的琛都存放家中，小心翼翼放入膠文件袋，避免再弄濕或磨損，再按日子分類。下一步，他想做個文宣品目錄，但現在還沒有時間。收集過程中，黎的琛跟這個抗爭時代及許多無名氏連結起來，是他最為享受的一環，「現場戴口罩，網上用無名account，體現嘅係無私精神，雖然唔會知對方係邊個，但會互相扶持，互相加油。」
盼在港及海外展出
紙本損耗、折舊快，有些文宣已發了霉，黎的琛希望找到合適地方保存，長遠也想在香港及海外展出，「香港呢個社會，要將一啲嘢wipe out from我哋個腦，其實好簡單，例如某報紙竟然話係PTU救熄八仙嶺大火；2003年（沙士）唔關大陸事；六七暴動，成個government archive只得30分鐘短片。」因此，黎的琛盡力收集不同光譜、訴求的文宣，「例如有人好認同血債票償，有一啲人好唔認同」，好好保存、仔細紀錄，才能保留最完整的真相，「希望令到人有朝一日再見到文宣時，可以知道當時大家嘅mentality係點，以點樣嘅心情去參與呢個運動。」