港台雖然係官台，但記者都本住專業精神對遊花園嘅高官權貴窮追猛打。近日有藍絲睇唔過眼，話要發起「一人一信」行動，向廣播處長梁家榮投訴本月2日出席警方記者招待會時，多次要求警隊高層正面回應問題嘅港台女記者陳妙玲（圖），指控陳不斷追問警方高層係「有違記者專業操守」，亦「有損香港電台作為政府屬下電台的應有態度」，更指佢「多次隨意高聲發言，並加上強力手勢」，同佢同事利君雅「同出一轍」，要求港台即時炒咗佢喎。當然藍絲絕口不提，當日警方高層根本一直迴避、無法令市民知道真相嘅呢一點。
眼見藍絲又搞港台記者，慎防廣播處長有藉口打壓記者嘅新聞採訪自由，連登仔決定以其人之道還治其人之身，噚日喺連登呼籲大家用番「一人一信」方式電郵去港台mailto:[email protected]力撐陳妙玲，希望以人數力蓋藍絲嘅抹黑行動。連登仔草擬好嘅信件指，早喺8月中特首林鄭月娥記者會，已留意到陳妙玲多次努力追問特首尋求真相，9月初警方記者會上更以一針見血嘅問題，應對警方迴避嘅態度同重複言論，專業精神值得嘉獎。對於連登仔發起電郵力撐，陳妙玲接受八方查詢時就話：「多謝大家關心」。