逆權運動展開近三月，特首林鄭月娥前日宣佈立法會復會後，撤回《逃犯條例》修訂，卻無視其餘四大訴求。一直走在前線的阮民安（Tommy），昨天獲邀到樹仁大學的罷課集會分享，他直言不會收貨，對於林鄭表示會落區聽取民意，Tommy說：「其實好想問吓警員濫暴、拘捕市民，呢啲行為係咪你去支持嘅呢？希望特首可以正面答我，唔好耍我。」
踏入9月，大專院校紛紛開學，不少學生在發起罷課抗爭，阮民安昨日與袁天佑牧師及青年新政召集人梁頌恆，獲邀到樹仁大學的罷課集會分享，Tommy接受訪問時說：「佢哋上星期邀請我嚟，我第一時間答應，我覺得兄弟爬山，各自努力，每個動作都係一個支持，所以我能夠參與或者需要到我，我都會盡力出席。」
轟語言偽術
特首林鄭月娥前日發表電視講話，提出四項行動，第一是宣佈保安局局長在立法會復會後，會根據《議事規則》撤回《逃犯條例》修訂，Tommy直言不會收貨：「佢喺度語言偽術，佢話撤回但係太遲啦，佢應該喺6月9號講，呢幾個月就唔會演變呢啲事。其實唔單止《逃犯條例》，香港每一個政府部門都咁腐敗，去到呢一刻相信仲有好多訴求，係需要去解決先可以停落嚟。」
林鄭其中一項行動是與司局長落區與市民對話，Tommy表示願意跟特首對談：「佢所謂嘅落區都係大龍鳳箒，就算搵兩個人加入監警會嘅都係自己人嚟，所以我覺得真正想聽民間訴求，就是但搵一晚落去集會嘅地方，或者每間大學是但一個地方，睇吓佢夠唔夠膽咁做。」問Tommy想跟林鄭傾甚麼？他說：「其實好想問吓警員濫暴、拘捕市民，呢啲行為係咪你去支持嘅呢？點解可以去到一個咁冇人性嘅表現？究竟係邊個畀權力或者命令佢哋咁樣做嘅呢？呢啲係好冷血嘅行為，希望特首可以正面答我，唔好耍我。」
Tommy又表示自己之前去過不少遊行及集會，也有在網上做文宣打氣：「每個人有唔同嘅崗位，我最主要係想分享，呢件事差不多三個月，大家有傷心、有憤怒、有失望。」Tommy認為去到一個位置要放鬆一下：「我哋做藝人希望帶娛樂畀大家，係好重要。我8月31號去咗銅鑼灣busking，大家好開心，雖然之後又催淚彈又水炮車，但起碼喺嗰50分鐘入面大家得到少少放鬆，我諗我係咪要做多啲呢？」
免費音樂會
Tommy指最近在網上收到很多不同的訊息，都向他訴說不開心兼好大壓力，更有人稱想自殺，所以他計劃搞一個音樂會：「年輕人做咗好多嘢，希望可以畀年輕人娛樂一下，呢個騷小學、中學同大學生完全免費入場，在職人士就會有個97價，可能280至380蚊就可以睇騷。」
採訪：羅慧敏
攝影：陳慧安