這段時間，正藉如此動盪的環境，竟然有機會見到神級影帝發哥賣新廣告，的確有點錯愕而且極其罕有。
搵明星拍廣告大有人在，銀行、保險、旅遊、餐飲、月餅、護膚品數埋一籮籮，但搵得起發哥，今次高銀集團宣傳的何文田樓盤《傲玟》真係殊不簡單。發哥近年甚少拍廣告，一來可能要求高要睇吓係咩品牌兼做啲咩；二來發哥唔憂做，廣告費叫價自然也絕不可少，點都貴過三兩個單位的價錢，並不是人人請得起。對上發哥做主角給人留下深刻印象的廣告，已經係澳門皇冠酒店、數碼通、鐵達時。
新廣告裏講到發哥以養馬及馬術，教導小女孩人生道理：「人生嘅修練，冇得急 」。故事無問題，再加上發哥的精湛演技，當然好有睇頭兼有強烈電影感，但問題在於如今這個時間仍然急於推出新樓盤，雖則高銀有說目前社會的不穩氛圍僅屬短暫，等一下就可以開賣。但說穿了，睇嚟都係急住要cash，拖不到市道好番啲才賣廣告繼而賣樓。
廣告既然出咗，又用得發哥，自然有助建立即時產品知名度及引起興趣，高銀話短短幾日已接獲逾500宗查詢。然而，最近又聽聞有其他樓盤的買家撻訂，最終如果高銀唔落價，有冇人買，就真係有些不太樂觀。
見到這個局勢，各大小品牌都變得保守與審慎，莫講話最少成千萬的樓盤，就算幾廿蚊或幾百蚊的快銷品，都採取hold住先、wait and see的做法。如非受壓和迫不得已，好似高銀今次，之前點知今日個市會變成咁，唔拍都拍咗，冇得收返，揼心都要硬着頭皮推啦。
至於廣告用明星與否，首先要睇marketing budget及策略，有時妹仔大過主人婆，觀眾睇完只記得個明星而不記得品牌及產品，效果盡失。加上呢個這個時勢，用明星的計劃亦會再三考慮，一個唔覺意，那位明星唔知講錯或做錯啲咩，其代言的品牌與產品就會被牽連，得不償失。
文迪晞
mailto:[email protected]