名模馬詩慧（Janet）、大女王曼喜與Cara G.等，昨日在灣仔出席時裝活動，Janet指最近社會氣氛不好，工作量也減少，她說：「雖然我不嬲都冇乜嘢做，家用都冇乜，不過Michael（丈夫王敏德）嘅品牌生意都有影響，佢嚟緊下星期有手錶聯乘活動，佢一直都想有自己品牌，𠵱家當攞多啲經驗。」擁有服裝品牌的曼喜則指一家人都喜歡設計，經常互動給予靈感，她笑指母親Janet的設計新潮，她將會製作母親設計的衣服。
另外，育有三女的Cara笑言為照顧女兒很忙碌，連細女出生多久也忘記了，她笑說：「應該係三個半月大，因為我哋唔係傳統中國人，所以冇百日宴，細女Noa真係好可愛，好容易湊，大女對細妹Noa簡直係迷戀，又攬又錫，當有人抱起Noa時佢會唔開心，唔想其他人碰佢，就好似個小幫手。」
採訪、攝影：羅慧敏