特首林鄭月娥前日終於肯將送中惡法由暫緩變撤回，不過為佢頂咗前後成三個月嘅建制派梗唔高興，原來送中惡法可以撤嘅，咁佢哋好似儍仔咁硬頂為乜呢？不過都有醒目建制派立即華麗轉身，話自己有份「成功爭取」撤法，好似立法會議員梁美芬噚日上商台，講自己點用咗好大努力爭取「撤回」惡法，不過佢咁快抽水，似乎辣着建制支持者，要急急收番領功言論。
澄清領功圖來自《晴朗》
梁美芬喺商台話自己用咗好大努力爭取「撤回」二字，包括曾用普通法說服內地專家同香港政府、利用自己位置喺香港同內地反映意見，又喺報章撰寫過法律分析，又有同示威者、勇武、前線接觸，又同以前戰友傾，又話好多衝衝子原本唔想再衝，想搵「橄欖枝」離場，今次終於難得攞咗第一個橄欖枝！
見到梁美芬爭住拎功，商台《在晴朗的一天出發》特別喺fb整咗張表揚佢「成功爭取」嘅圖，點知張圖一出引來網民瘋傳，唔少網民不忘送佢一程，聲稱唔怪得6.9、6.12等場合見到梁美芬落場！又有人將《晴朗》製圖貼去藍絲fb，大大力讚佢，搞到唔少藍絲以為張圖係梁美芬自己整，大鬧佢抽水！
可能見勢色唔對，梁美芬立即係fb出po，澄清張圖左上角有個淺藍色《晴朗》logo，呢張圖唔係由佢製作、發出，又話「成功爭取」咁大頂帽佢戴唔起，唔該大家高抬貴手，唔好玩佢啦，討論吓點解開香港呢個結仲好啦！八方覺得梁美芬作為建制派，唔好又要威又唔戴頭盔，好易出事嘛！
李八方