鄭文雅在1979年成為港姐冠軍，今年剛好40周年，她當選後比現在的港姐發展精采得多，由跳高運動員、高爾夫球手、演員、攝影師、整陶瓷到近年鑽研書畫藝術，再到早前與老師及同學開藝術展覽，多了一個篆刻雕塑家的身份。她愛挑戰自己，越陌生的事物越去嘗試。
撰文：梁錦雯
攝影：周樂恒
鄭文雅明年將60歲，回帶認識她的第一步，必定是香港小姐，她笑言：「好似唔係好耐，跟住就40年，我覺得選唔選美都唔緊要，每一個人都要善用時間，因為時間快得驚人。選美係好特別嘅人生經驗，不過之後嘅人生路點走，選美係話唔到畀你聽，好多人選完美後，都各自有唔同嘅生活。」
凡事都要練
選美之前，鄭文雅是一個跳高運動員，某程度上已訓練到有種克服的個性。人生盛年時，她用了十年時間去拍戲，經歷了香港電影80年代的黃金時代，香港金像獎的獎座更是以她的身形線條而來，她說：「拍電影係一個集體創作藝術，學到好多嘢。」
對於近年選美已被批評沒有代表性，作為大師姐的鄭文雅表示整個包裝已不一樣：「以前選完係代表香港旅遊協會去介紹呢個小地方，係有個mission喺度，𠵱家係選完好似一個藝員，整體性唔同咗，唔可以話𠵱家唔啱，係時代唔同。」仍會鼓勵女仔參加選美嗎？她笑說：「如果唔係好知自己想做乜，參加都幾好，始終有一個機會，參與吓冇壞。」由運動員、選美到藝術工作者，對鄭文雅來說都是一個學習過程，她說：「咁多樣嘢都有個共通點，必須要練返嚟，冇諗過有shortcut，拍戲都係，要練返嚟，要人生經驗，藝術同運動都係要經驗，係唔停得一個練字。」
多謝老公撐
成就今日的鄭文雅，除了自我要求高，她表示要多謝結婚28年的老公虞哲輝，她笑言：「我好好彩，老公好支持我𠵱家做嘅所有嘢，唔係佢，唔會有今日嘅我。」
提到明年便60歲，鄭文雅表示沒有年齡關口，問到她養生扮靚貼士？她自嘲是懶人，靠睡眠充足：「我係新界人，最好嘅養生就係跟住太陽嘅日出日落作息，去到我哋呢個年紀，唔好講外表，講係唔係健康先，因為健康最緊要，唔係點做咁多嘢。」提到前幾年她媽媽與外婆都發現有腦退化症，會否有心理準備發生在自己身上？鄭文雅說：「我keep住學嘢做嘢，腦筋不停運用，我唔會因為遺傳呢樣嘢乜都唔做，反而會學多啲，做多啲。已經一早同老公講，唔記得嘢唔好怪我。」
更多精采時尚內容，盡在 http://add.appledaily.com。