現年79歲的吳耀漢今年初自爆患上腎衰竭，需要每天洗肚，但他沒輕言退休，年初拍過賀歲片後，早前更遠赴馬來西亞拍攝靈異驚慄片《雙魂》。雖然身罹頑疾，吳耀漢日前受訪時提到近日香港的社會問題，仍發火大鬧：「你個X家鏟政府，加稅加到咁！」
採訪：王連連
攝影：陳俊強
吳耀漢近年漸覺身體機能開始退化，年輕時休息半小時便可以繼續拍戲，但現時至少兩小時，新片中他要跟戲中太太吳浣儀和女兒衛詩雅有爭執戲，消耗不少體力，他說：「家人以為我病到攤攤腰，其實唔係，我仍然可以做嘢拍戲，可以揸車出街冇事，唯一遺憾冇啖好食。早幾日去馬來西亞拍戲，老婆都叫我諗清楚，但睇咗劇本，我覺得應付到。」
倡全面減稅
70年代出道的吳耀漢直言，由始至終都喜歡演戲：「冇第二樣嘢鍾意，每一次都係一個新嘅遊戲、新挑戰，我玩咗好多遊戲，最鍾意做喜劇，自己做嘅時候開心，睇番片自己都忍唔住笑。」可是，提到近日的社會問題，育有一子三女的吳耀漢也不吐不快：「最近咁多事發生，關於香港社會我有個好簡單諗法想畀啲意見，可能第一件事要做係全面減稅，所有政府機構賺少啲錢，香港公共服務賺少啲，如果政府同大機構做呢啲，巿民生活好好多。我唔算窮，但覺得十幾元一公升電油，一大半係稅，係冇必要嘅，煙仔𠵱家要五十幾元一包，話貴到咁要戒，廢話！我一定唔會戒，但每次買煙就心諗：『你個X家鏟政府，加稅加到咁！』香港啲稅搏命咁加，咁多年來搏命喺我哋巿民身上搵錢，搵搵埋埋唔知用嚟做乜。」
縱到亂晒龍
父親吳海霖是九巴和九龍殯儀館的創辦人，身為富二代的吳耀漢也明白民間疾苦，他說：「好多人都話點解咁辛苦，買樓又辛苦、交學費又係辛苦，港鐵又話加價，香港所有服務機構，每年都要賺唔知幾個億，點解一定要賺咁多錢？外國好多政府生意係蝕，我哋香港政府每一個部門都係諗緊點樣同政府搵多啲錢。香港任何一個官賺嘅錢多過我哋國家主席，有乜可能？香港政府係放縱到亂晒龍。」他感概社會上的人每日起身便要想着怎樣能賺更多錢：「所有嘢錯晒，人生唔係話每一日做人要搏命去搵錢，我覺得政府要檢討、帶領，我講嘅係全面化。」
老馬有火，不過談到兒子吳嘉龍，吳耀漢就立即露出一面慈父相，他說吳嘉龍做戲堅持自己摸索，其實好有天份，只可惜廣東話不流利：「因為佢係混血，好多導演會有少少偏見。」
腎功能餘一成
吳耀漢今年1月底出席活動時自揭患上腎衰竭，腎功能只剩一成左右，難得他在訪問中說得簡單又輕鬆：「年紀大，可能機件開始壞，感覺係個身體陸續呢樣嗰樣，除了洗腎，身體開始老化，呢隻眼（左眼）就快要做白內障，早排成日流鼻血，早幾日入醫院電個鼻入面嘅微絲血管電死晒，總之係OK啦！」
吳耀漢每日要洗肚（腹膜透析）四次，每次洗一個鐘，排除身體毒素續命。談到腎病由來，他曾指以前拍戲常吃快餐有影響，早三、四年前做身體檢查，已經發現肝酵素等指數升高，去年證實腎功能只餘兩成，到今年只餘一成。至於另一種俗稱洗血（血液透析）的洗腎方法，吳耀漢指政府或私立醫院都已爆滿：「有錢都未必有人同你洗，香港好多人有腎病，多到連啲醫院都應付唔切，而且費用好犀利，幾千蚊洗一次，一個禮拜兩次。」