差人最近不斷用各種不合理方法，阻記者採訪拉示威者，俾記協鬧妨礙新聞自由。一向親北京嘅導演高志森噚日竟然走去同差人出頭，喺facebook發文話記協「毫無公信力」、「不必要存在」，又話係新聞片見到好多記者從旁不停襲擊差人，呼籲市民去信特首林鄭月娥、警務處處長盧偉聰取消記協權力、又話要學歐美國家，記者證要由警務處簽發。
其實要擦差人鞋冇問題，但低水平到連事實都搞錯，就係攞架嚟丟。記協噚日喺fb反駁高導演，歐盟記者證唔係差人發，係工會發，冇錯，荷蘭同紐約警察會發記者證，但人哋個記者證可以入埋警方封鎖線，香港記者證就乜都唔得，「又過唔到封鎖線，又防唔到胡椒水」，仲揶揄真正由政府或警察發記者證嘅國家，只有大陸、北韓、敍利亞、蘇丹、土庫曼斯坦等被國際社會視為極權或獨裁國家，或者高導演覺得，香港新聞自由已同北韓睇齊，所以有咁建議。