上星期六巴西甲組聯賽聖保羅主場0:0賽和甘美奧嘅賽事度，發生咗一宗恐怖意外，據事發時嘅片段所見，一位球迷喺球場嘅看台由高空墮下（圖、紅圈示），嗰位球迷喺空中轉咗至少一個圈後，壓中看台底層嘅觀眾。
據英國《太陽報》報道，喺聖保羅能容納66,795名觀眾嘅球場入面，一位叫de Melo Rios嘅23歲男球迷，喺「落台」前已爬上看台上層嘅圍欄，不過就唔知佢係因乜嘢事突然喺看台上跌落嚟，據報嗰個看台至少高40英呎（約12米），即係大約四層樓嘅高度；當嗰位男人喺空中打圈後，跌落看台底層嗰陣仲壓中咗1位叫Giovana Santos Araujo嘅13歲少女，佢哋兩個隨即送院檢查。不過佢哋兩個都好好彩，23歲嘅男球迷只係股骨骨折，而13歲嘅少女直頭冇大礙，可謂不幸之中大幸。