【舖仔小店】
逆權運動持續三個月，零售餐飲業市道不佳，不少食肆生意受影響。灣仔素食餐廳「麗姐廚房」早前被指三個月內蝕過百萬，面臨倒閉危機，藝人梁祖堯得知事件後立即於fb發文，呼籲港人多加支持此素食小店，是甚麼令阿祖如此賣力？
梁祖堯8月尾正忙於與藝人黃秋生、徐天佑演出舞台劇《尋常心》，事隔一星期，梁祖堯接受記者訪問，講述為何會於社交平台上力撐麗姐，「剛公演嘅舞台劇都係關於『社會運動』題材，心情點都有啲影響，可能我做嘅角色性格比較激進，因此我覺得自己嘅行動力高咗好多，所以就決定打上facebook。」在如此社會氛圍下，公演期間打一篇力撐文章，難免有機會被文革式清算，但阿祖卻表示當時未有思考太多貼文帶來的後果，「一收到短訊知道麗姐出事，我記得自己仲喺化妝間化緊妝，就立即打呢篇嘢。等公演完先認認真真寫啲嘢？唔好玩啦，我覺得有啲事唔可以等。」
facebook出post 網民反應大
麗姐與阿祖相識至今已五年，聽畢阿祖的窩心發言，臉上立即流露感動的笑容，「今次我好感恩有阿祖幫我，特別係今次佢喺社交平台上咁樣撐我，網民反應大到不得了，我同個女講，『媽咪今次好似做咗主角咁』，呢個主角感受到大家嘅愛。」平時於鏡頭或舞台上總是掛着抵死笑容的梁祖堯，當聽到麗姐感言，亦不禁流了幾滴眼淚，隨即與麗姐擁抱，「香港食素嘅人老實講有幾多，我自己都係小眾（舞台劇界別），梗係要幫返小眾！」
問到梁祖堯與麗姐如何相識，正在扒飯的阿祖立即噴飯（是真的噴飯），「我有個綽號叫『無底洞』，第一次去佢餐廳食嘢好似食咗三碗白飯，食極都唔會完、唔會夠咁，麗姐見到立即開始話『係咪唔夠啊』，『得啦，唔使叫夥計啦，再裝飯畀你啦』，我諗麗姐當時係想認住呢條友，下次唔好畀我再來，哈哈！」
「炸雞髀」工夫多 腐皮逐層繞
所謂「一方有難，八方支援」，此話其實並不是理所當然，梁祖堯表示今次之所以會力撐麗姐，全因從她烹調的食物中，感受到她的心思，「我好想學習佢一樣嘢，就係用一啲身邊最簡單的食材，大家會見過或搵到嘅食材，去花心思整啲菜式出來，呢個『炸雞髀』，係真係用腐皮逐層逐層繞出來，你諗吓要花幾多工夫。」阿祖又表示，去衡量一間餐廳是否出色，並不是只單單從食物美味的程度來計算，「呢度會食到好屋企嘅味道，我個人認為屋企嘅味道是好重要，因為大家越來越少返屋企吃飯，香港人其實唔係真係單純追求緊好味嘅食物，而係嗰種關心，而麗姐廚房係做到嘅。」
後記良心小聚
逆權運動下社會氣氛低迷，訪問後記者亦有與阿祖一同討論社會現況，講到麗姐廚房萬一因為此役市道不佳而倒閉，他會有甚麼感受，阿祖說：「如果你話雞蛋同高牆，麗姐無疑是一隻雞蛋、一隻烏鴉蛋。烏鴉蛋你知唔知係乜顏色？成隻都是藍綠色，而呢種蛋係冇乜人見過。如果麗姐廚房喺冇人見過嘅情況下被破壞，對我來講只係冇咗間鍾意嘅餐廳，但對香港來講就實在太可惜啦。」雅俗之別，大眾小眾如何區分？我只知眼前的「小眾」比「大眾」更有良心，更有道義。
麗姐廚房
地址：灣仔譚臣道105-111號豪富商業大廈二樓A-D室
記者：鄧偉傑
攝影：張志孟、伍永健
