陳志雲噚日喺新蒲崗接受項明生主持嘅節目訪問，表示啱啱到台灣採訪兩位7月1日衝擊立法會而流亡嘅示威者，話台灣當局嘅援助好有限：「佢哋思路好清晰，我問佢哋有冇後悔，雖然佢哋話冇，從對方眼神睇得出受到好多委屈。」對於特首林鄭月娥正式撤回送中條例，志雲認為有做好過冇，同時贊成成立獨立調查委員會：「大部份民意都係希望成立，但係佢有乜顧慮同掣肘，應該要同公眾解釋多啲。」
一人行一步
而黃秋生以短訊回應︰「林鄭需要學會明白，回應同答應不同，答應市民合理訴求亦唔係軟弱嘅表現，正相反，作為一個領導者，同民眾嘅溝通係需要勇敢去面對問題，方法唔係得打打殺殺一個。今次應該係一個好嘅新開始，希望事情可以改善，共同解決問題。同政府爭取從來不易，起碼有個好開始，當然仲有更嚴重嘅問題要解決，部份警員或警隊甚至市民或政府是否涉及參與犯罪，極需要調查同向市民用一個正常精神狀態交代。因為若任由雙方罪行就此抹去，政府以後亦無法獲得市民任何信任，難以運作。但係起碼一人行一步先。」秋生之後再補充︰「咁多人出嚟指正暴行，千祈唔好學日本軍南京大屠殺咁，一句我唔同意你嘅講法就當冇事。」
撰文：馮仁昭