近日香港警隊喺「反送中」運動使用過度武力執法，令香港市民人心惶惶。8.31入港鐵車箱搜捕示威者嘅場面，如同7.21元朗恐襲嘅翻版，引起社會恐慌兼造成爭議，所以香港嘅各大球迷會紛紛喺社交網站發文，話要同警隊割席。不過，內地球迷會就唔係咁睇，好似中國各大省市嘅曼聯球迷組織就大力撐警，仲話因為紅魔係紅色，同中國國旗都一樣係紅色，所以令佢哋更大決心要擁護中華民族，你話係咪歪理？
上海會會長譴責港曼迷
香港球迷會團結一心，各自發聲抗暴，不過喺香港曼聯官方球迷會就「警暴」表態後，就引嚟中國各大省市嘅曼聯球迷組織，決定同香港呢邊割席。中國曼聯球迷會同深圳、天津、杭州等曼聯球迷會，都喺微博上發言撐警，深圳市球迷會仲話：「我哋信仰曼聯嘅紅色，我哋更擁護中華民族嘅紅色……深圳曼聯球迷會支持香港警察嚴正執法！」仲大大隻字寫上「What a shame for Hong Kong」，指摘抗爭者搞亂香港。
另外，上海曼聯球迷會負責人寒羽，就喺微博同香港曼聯球迷會割席，爆粗話已經取消關注：「我一直將球迷會視作服務球迷嘅平台，我都曾經好自豪同好榮幸，可以同香港球迷會一齊成為最早期嘅中國官方球迷會，咁係一種肯定，都係一種榮譽。但家陣，我只想講，Shame on you！」呢位負責人又補充話相比之下，香港車路士球迷會嘅聲明算係較中立，但話球迷組織唔應該帶上政治立場，同埋唔能夠代表所有球迷。
其實當時走喺最前嘅，就係香港車路士官方球迷會，佢哋嘅第4任華人會長Tommy喺8.31後翌日，喺fb出po話球迷會好重視會員安全，由於香港社會出現警民衝突，唔希望會員出席活動時因為政見問題而發生不愉快事件，呼籲現役警員退出球迷會，而且會無條件退回會費。雖然佢哋一再強調同政治立場無關，只想保障會員人身安全同希望警務人員可以將精神放喺工作上，但引嚟其他好似利物浦、曼聯、曼城同阿仙奴等香港球迷會相繼響應發聲，而利記官方球迷會仲引用番希斯堡慘劇，表明恥與黑警為伍；至於曼聯球迷會就呼籲，球迷會入面嘅警察會員，應該憑良心同良知去做正確選擇。
香港利迷拒刪聲明
另外，香港利物浦官方球迷會指已收到球會通知，認為佢哋早前發出嘅聲明有違球迷會守則，要求刪除，但球迷會方面並唔同意，仲作好隨時冇咗「官方資格」嘅打算。