葡萄牙球王基斯坦奴朗拿度（C朗），星期二正式當選為2019年葡萄牙最佳球員（葡足先生），今次係C朗自2007年後，第10次獲得呢項殊榮，比起獲獎第2多嘅名宿費高仲要多4次，堪稱葡國史上最佳球員。C朗獲獎後話：「家陣世界變化萬千，對我個人嚟講過去1年係複雜嘅1年，努力避免任何人將我踢走。」
另外，意甲今季起實行咗一條新例，上季獲選最佳球員嘅六位球員，喺新季可以喺波衫戴個藍色嘅「最佳」球員襟章，而上季得獎嘅六位球員分別係最有價值球員C朗、最佳門將漢丹洛域、最佳後衞高列巴尼、最佳中場米連高域沙域、最佳前鋒加利亞雷拉同最佳年青球員尼高路辛尼奧路。
不過喺上星期祖雲達斯對拿玻里場波，C朗冇戴章出賽，成為唯一一位冇戴章嘅得獎球員。據意大利傳媒透露，C朗咁做係唔想令自己喺隊內有特權，希望可以同隊友保持相同地位。