前晚路透社爆出特首林鄭月娥閉門會面錄音，又話自己冇得揀辭職，又暗示已冇權化解反送中運動，大搜捕又好，警暴升級又好，已經唔關佢事，即係變相將北京擺上枱，政界對此無不議論紛紛，但有政圈好事之徒留意，林鄭喺錄音最激動嘅位，喺冇得shopping同去髮型屋，真係香港天下大亂都好，行街扮靚係唔可以冇。
市民擔心後生仔 林鄭掛住濕平set髮型
根據錄音，林鄭講到反送中抗爭影響到佢日常生活，呢個時候佢把聲有啲激動，話外出困難，冇得行街，冇得去商場同髮型屋，因為外出一定俾連登仔公開行蹤，又或俾人放上Telegram，到時必有一大班身穿黑衣、戴黑色口罩嘅後生仔等佢。而噚日林鄭一早開行會見記者，八方特別留意佢嘅髮型，同以往比較又真係有啲亂，兩鬢現白髮，唔知同冇得去髮型屋有冇關？
八方不禁想起好多網民、市民都話，見到香港今時今日局勢，都冇晒心機行街買嘢消費，成日只係關心街上面後生仔女安全，點解林鄭可以有心情諗住shopping同去髮型屋？
李八方