記者經常被警方粗暴質問「係咪假記者」，8.31當日，八方正喺銅鑼灣工作，一名冇戴任何防具、只着上印有Press字句反光衣嘅男子，不斷用手機拍攝示威人士，八方上前詢問男子屬邊間報館，佢話自己係挪威記者，但講嘅係一口唔純正廣東話。
八方想知挪威邊間媒體有「特派員」來港報道，要求佢出示記者證，點知佢唔肯，仲轉身向住警方防線跑去。去到警方防線，八方向警員表示「呢度有假記者」，不過英勇克制嘅警員並冇理會。呢位「記者」繼續避，仲叫八方「唔好搞事」，然後再拔足狂奔。八方由崇光追到波斯富街。當佢第二次經過警方防線時，八方再向警員表示有假記者，警員對佢哋口中嘅「黑記」視若無睹，「挪威記者」當然成功逃脫。