前兩日講及廠商L與測量L，兩人都有提及越南，設廠及買樓現在都失咗先機嘞，因為成本與樓價都貴咗好多。測量L說越南係十幾年前嘅深圳，當然，如果你相信越南有前景，今日照買無妨，十幾年前深圳有邊個知道騰訊一飛沖天啫。
不過廠商嘅L話越南工人性格與珠三角之外來工人有所不同，四川勞工到東莞打工，一味想賺錢回鄉，鍾意晚晚開OT，攞加班費，因為冇工開返宿舍靜靜哋，反有思鄉思妻病。但越南工人嘅家庭就在工業區附近，一夠鐘放工就想返屋企，叫佢哋開OT就耍手擰頭，廠商L有朋友就曾經此苦，在越南想叫工人開OT趕出貨趕船期，冇人肯啋佢也；是故在越南接美國火急訂單，有時反會孭鑊。廠商L就因此舉棋不定，搬廠與否還在考慮研究，希望憑高品質貨品留住啲買家，吸引到一啲巨型美國入口零售商，例如Costco。
講開Costco，近日在上海開新店，轟動一時，吸引大量人群入內，外圍塞車三小時，內裏塞人兩小時，排隊付款等一小時，過往家樂福、Tesco、沃爾瑪、亞馬遜在中國都做到棄械投降，Costco有何特別，可以在中國抗衡淘寶網購？廠家L話：「Costco勝在夠平，買我公司一件貨品，只會加價大約14%出售，我賣畀另外一啲零售商，佢哋會mark up 50%至100%，消費者貨比貨之下，梗係湧去Costco。點解佢可以賣得咁平？第一係一日有貨一日運走，冇儲貨成本，第二係薄利多銷，顧客一定要買大量，譬如買洗衣粉，一買都一大箱（香港納米屋擺唔落），第三就係會員制，顧客先要交一年會員費先可以入內買貨，美國Costco有一億個會員，收益好大。第四就係90天內可以退貨，十分公道。」
於是上網睇吓Costco在美國如何收費，原來有基本會員，每年收60美元會費，又有一種優惠會員，120美元，單是會費，每年已可有近100億美元收益，但會費就係純利之主要來源。調查顯示Costco每件貨平均賺11.4%（毛利），係極低數字，故此極為吸引顧客。事實上Costco從零售生意賺錢唔算多！呢個方法在美國盛行honor code嘅社會就好掂（例如買報紙自行付款，冇報販在旁收錢），到咗中國又如何？內地網民已經講，90天退貨係死路一條，Costco可能收退貨收到嗌救命，教美國商人領略中國人攞便宜唔使頸嘅一面，如果真是如此，中國人，醜死鬼，會畀美國人恥笑、睇死。